Sansar News
माघ १८, काठमाडौं । विभाजित नेकपाको प्रचण्ड–नेपाल पक्षीय नेता सुरेन्द्र पाण्डेले प्रधानमन्त्री केपी शर्मा ओलीले राजावादीहरुसँग सहकार्यमा रहेको बताएका छन् । आइतबार प्रचण्ड–नेपाल पक्षले माइतीघरमा आयोजना गरेको धर्ना कार्यक्रममा बोल्दै उनले यस्तो बताएका हुन् ।
उनका अनुसार आगामी माघ २३ गते ओली पक्षले गर्न लागेको आमसभामा सहभागी हुन राजावादीहरुले समेत उर्दी गरेका छन् । उनले भनेका छन्, ‘म सुन्दैछु, ओली पक्षले २३ गते गर्न लागेको कार्यक्रममा सबै राजावादी उपस्थिति हुनु भनी पूर्वराजावादी नेताहरुले उर्दी जारी गरेका छन् रे ।’
याे पनि…
उनका अनुसार आमसभाको दिन ओलीले हिन्दु राष्ट्र घोषणा गर्नसक्ने चर्चा छ । ‘यही २३ गते ओलीले हिन्दु राष्ट्र घोषणा गर्छन् भन्ने चर्चा चल्दैछ । ओली यो बाटोमा लाग्न सक्छन्’ उनले भनेका छन् ।
ओली पक्षले आगामी माघ २३ गते नारायणहिटी दरबार अगाडि जनसभा तयारी गरेको छ । नारायणहिटी दरबार अगाडि गर्न खोजीएको आम सभालाई अर्थपूर्णं रुपमा लिइएको छ । जुन तयारीका बीच प्रचण्ड–नेपाल पक्षीय नेता सुरेन्द्र पाण्डेको अभिव्यक्ति सार्वजनिक भएको हो ।
वि.सं.२०७७ माघ १८ आइतवार १४:३९ मा प्रकाशित
