Sansar News
१९ माघ, काठमाडौं । नेपाल कम्युनष्टि पार्टी (नेकपा) प्रचण्ड–माधव समुहको केन्द्रीय समितिको बैठक कार्की ब्यांकेटमा बस्ने भएको छ ।
पार्टी कार्यालय कार्की ब्यांकेटमा १ बजे बस्ने भनिएको केन्द्रीय समितिको आजको बैठकमा समसामयिक विषय, संघर्षका कार्यक्रमको समिक्षा तथा संघर्षका थप कार्यक्रमको तयारी, कार्यविभाजन लगायतका विषयमा छलफल हुने सचिवालयका मुख्यसचिव श्रीराम ढकालले बताएका छन् ।
प्रधानमन्त्रीद्धारा पुष ५ गते प्रतिनिधिसभा विघटन भएसँगै निरन्तर संघर्षका कार्यक्रमको घोषणा गरेको उक्त समुहले संसद् पुर्नस्थापना तथा निर्वाचन आयोगद्धारा आफ्नो बहुमत पक्षलाई बैद्यानिकता दिन माग राख्दै आएको छ ।
प्रधानमन्त्री ओलीको कदम प्रतिगामी र असंबैधानिक ठहर गर्दै सो समूहले प्रतिनिधिसभा विघटनको विरुद्धमा देशव्यापी रुपमा प्रदर्शनका कार्यक्रमहरु गर्दै आएको छ ।
सो समूहले प्रतिनिधिसभा विघटनका विरुद्ध उपत्यका तथा उपत्यकाबाहिर बुटवल, विराटनगर, धनगढी लगायतका सहरमा प्रदेशस्तरीय प्रदर्शन गर्दै आएको छ । साथै माघ २८ गते काठमाडौंमा वृहत् विरोधसभाको आयोजना गर्ने घोषणा समेत गरिसकेको छ ।
वि.सं.२०७७ माघ १९ सोमवार १०:१४ मा प्रकाशित
