Sansar News
२३ माघ, काठमाडौं । नेपाल कम्युनिष्ट पार्टी (नेकपा) को केपी ओली समूहले आज बृहद जनसभाको आयोजना गर्न लागेको छ ।
सो समूहले आज दिउँसो १२ बजे नारायणहिटी गेट अगाडि बृहद् जनसभा गर्ने भएको हो ।
३ लाख बढी कार्यकर्ता सडकमा उतार्ने जनाएको सो समूहको वृहद् जनसभामा अध्यक्ष केपी शर्मा ओली तथा अन्य वरिष्ठ नेताहरुले सम्बोधन गर्ने कार्यक्रम रहेको छ ।
सो समूहले ‘अराजकताको अन्त्य र राजनीतिक स्थिरता, संविधानको रक्षा, राष्ट्रिय स्वाधीनता ताजा जनदेश विकासको निरन्तरता’ भन्ने नारासहित जनसभाको आयोजना गर्न लागेको हो ।
नेकपा बागमती प्रदेशद्धारा आयोजित उक्त जनसभालाई सफलतापूर्वक सम्पन्न गर्न नेकपाको काठमाडौं उपत्यका संयोजक कृष्ण गोपाल श्रेष्ठको नेतृत्वमा १ हजार १११ सदस्यीय जनसभा परिचालन कमिटी समेत गठन गरिसकिएको छ ।
बागमती प्रदेश कमिटीका सचिव खेम प्रसाद लोहनीका अनुसार प्रतिनिधिसभा विघटन भई निर्वाचन घोषणा गरिएको अवस्थामा जनतामा ताजा सन्देश दिनका लागि वृहद जनसभाको आयोजना गरिएको हो ।
प्रधानमन्त्रीको सिफारिसमा राष्ट्रपतिद्धारा पुष ५ गते प्रतिनिधिसभाको विघटन गरिएसँगै नेकपा दुई समूहमा विभाजन भएको छ ।
त्यसयता प्रचण्ड–माधव समूहले ओलीले असंवैधानिक कदम चालेको भन्दै त्यसका विरुद्ध विभिन्न चरणमा सडक आन्दोलन गरिरहेको छ भने ओली पक्षले पनि संविधानको रक्षाका लागि भन्दै विभिन्न समयमा जनशभा तथा र्याली गर्दैै आएको छ ।
वि.सं.२०७७ माघ २३ शुक्रवार ०९:०३ मा प्रकाशित
