हामी सबैकाे संसारन्यूज

२५ माघ, काठमाडौं । राष्ट्रिय मानव अधिकार आयोगले बैतडीकी १७ वर्षीया किशोरीको हत्यामा संलग्न दोषिलाई कारबाहीको दायरामा ल्याउन माग गरेको छ ।

बलात्कारपछि हत्या गरिएको भनिएकी दोगडाकेदार गाउँपालिका ७ की भागरथी भट्टको माघ २१ गते बलात्कारपछि हत्या गरिएको भनिएको घटनाप्रति आयोगको गम्भीर ध्यानाकर्षण भएको बताइएको छ । साथै उक्त घटनाको अनुगमनका लागि आयोगको प्रदेश कार्यालय धनगढीबाट अनुगमन टोली घटनास्थल गएको पनि जनाइएको छ ।

‘उक्त घटनाको निष्पक्ष र प्रभावकारी अनुसन्धान गर्न, अनुसन्धानको क्रममा साक्षीका सुरक्षा र प्रमाण संकलनमा विशेष सावधानी अपनाउन, घटनामा संलग्न दोषीको शीघ्र पहिचान गरी कानुनी दायरामा ल्याउन र पीडित परिवारलाई अन्तरिम राहत उपलब्ध गराउन आयोग नेपाल सरकारलाई आग्रह गर्दछ ।’ आयोगद्धारा आइतबार जारी विज्ञप्तिमा भनिएको छ ।