Sansar News
माघ २७, काठमाडौं । प्रधानमन्त्री केपी शर्मा ओलीले निर्वाचन तयारीबारे निर्वाचन आयोगका पदाधिकारीहरुसँग छलफल गरेका छन् । मंगलबार बिहान निर्वाचन आयोग पुगेका उनले प्रमुख निर्वाचन आयुक्तसहित आयुक्तहरुसँग छलफल गरेका हुन् ।
आगामी वैशाख १७ र २७ गतेका लागि प्रतिनिधि सभाको निर्वाचन घोषणा गरिएको सन्दर्भमा आजको छलफल केन्द्रित रहेको प्रधानमन्त्रीका प्रेस सल्लाहकार सुर्य थापाले जानकारी दिए । उनका अनुसार प्रधानमन्त्री ओलीले सरकारको तयारीबारे जानकारी दिँदै निर्वाचन आयोगले अगाडि बढाएका तयारीबारे जानकारी लिएका थिए ।
‘वैशाख १७ र २७ गतेका लागि गरिएको निर्वाचनको घोषणा सन्र्दभमा निर्वाचन आयोगले गरिरहेको तयारीका बारेमा जानकारी लिन सम्माननीय प्रधानमन्त्री ज्यू आज निर्वाचन आयोग आउनुभएको हो, उहाँले प्रमुख निर्वाचन आयुक्त र आयुक्तहरुसँग तयारीका बारेमा छलफल गर्नुभयो’, थापाले भनेका छन् ।
झण्डै २ घण्टासम्म चलेको छलफल निर्वाचन तयारीमै केन्द्रीत रहेको उनले जनाए । उनका अनुसार निर्वाचन आयोगलाई निरन्तर निर्वाचनको तयारी अगाडि बढाउन प्रधानमन्त्रीले सुझाब दिएका छन् ।
‘आयोगलाई निर्वाचन तयारीको कामलाई निरन्तर अगाडि बढाउन पनि प्रधानमन्त्री जीले सुझाब दिनुभएको छ’, थापाले भने ।
थापाले जनाएअनुसार नेकपाको आधिकारिकताको विवादबारे पनि छलफल भएको थियो । जसमा प्रधानमन्त्रीले निर्वाचन आयोगको कानून र हालसम्मका अभ्यासलाई अबलम्बन गर्न आयोगलाई सुझाब दिएका थिए ।
सम्बन्धित समाचार
वि.सं.२०७७ माघ २७ मंगलवार १३:३० मा प्रकाशित
