हामी सबैकाे संसारन्यूज

३ फागुन, काठमाडौं । नेपाली कांग्रेसले ‘सामाजिक संजाल ब्यवस्थापन’ का नाममा सरकारद्धारा अभिव्यक्ति स्वतन्त्रता कुन्ठित गरिन लागेको भन्दै आपत्ति जनाएको छ ।
यस विषयमा युवा पुस्तालाई सजग बन्न विशेष अपिल गर्दै प्रवक्ता एवं सूचना, संचार तथा प्रचार विभाग प्रमुख विश्वप्रकाश शर्माद्धारा सोमबार जारी विज्ञप्तिमा भनिएको छ, अन्ततः सरकारले व्यापक विरोधका बाबजुद ‘सामाजिक संजाल ब्यवस्थापन निर्देशिका’ का नाममा संसदमा विचाराधीन विवादास्पद सूचना प्रविधि विधेयकलाई नयाँ स्वरुपमा ब्युंताउन लागेकोमा नेपाली कांग्रेस गम्भीर आपत्ति प्रकट गर्दछ ।’
सामाजिक संजाललाई नियमन गर्ने, मर्यादित र स्वस्थ बनाउने प्रश्नमा कसैको पनि विमती नहुने तर त्यसका लागि विद्यमान कानूनभित्रै आवश्यक प्रावधान रहेको तथा थप ब्यवस्था आवश्यक रहे पनि वृहत्तर विमर्श नगरी संसद विघटन भएको समयमा निर्देशिका मार्फत जारी गर्नतर्फ लाग्नुले सरकारको नियतमाथि गम्भीर प्रश्न उब्जिएको पनि विज्ञप्तिमा जनाइएको छ ।
‘ कामचलाउ सरकारले नागरिक अधिकारलाई प्रभावित गर्ने गरि कुनै पनि कार्यकारी आदेशबाट निर्देशिकाहरु जारी गर्न हुंदैन, मिल्दैन र पाईदैन ।’ विज्ञप्तिमा भनिएको छ ।

प्रस्तावित निर्देशिकाको प्रक्रिया अघि नबढाउन सरकारलाई चेतावनी दिंदै नेपाली कांग्रेसले आजको देशव्यापी प्रदर्शनमा यो मुद्दालाई थप उजागर गर्ने समेत जनाएको छ ।
‘सामाजिक संजालमा ब्यक्त मतलाई सरकारी आवेगले कार्वाहीको दायरामा बांध्ने तयारी अधिनायकवाद तर्फको एक अर्को फड्कोको तयारी हो,’ विज्ञप्तिमा भनिएको छ, ‘यस विरुद्ध समयमै सजग बन्न अभिव्यक्ति स्वतन्त्रताका पक्षधर सबैलाई आग्रह गर्दै नेपाली कांग्रेस संजाल प्रयोगकर्ता युवा पुस्तालाई विशेष जागरुकताका लागि आह्वान समेत गर्दछ ।’