हामी सबैकाे संसारन्यूज

३ फागुन, काठमाडौं । अन्तराष्ट्रिय त्रिभुवन विमानस्थलले राति ३ बजेसम्म गर्दै आएको रात्रि उडानको सेवाको समय घटाउने भएको छ ।
विमानस्थलका प्रवक्ता देवचन्द्र लाल कर्णका अनुसार कोभिड १९ का कारण अन्तराष्ट्रिय उडानको संख्यामा गिरावट आएसँगै विमानस्थलको व्यवस्थापनले यसअघि राति ३ बजेसम्म भएको उडान सेवालाई चैत १५ गतेदेखि साढे १२ बजेसम्म मात्र गरिने निर्णय गरेको हो ।
विमानस्थलमा बिहान ६ बजेदेखि रातिको ३ बजेसम्म उडान सेवा हुँदै आएको थियो । यसअघि दैनिक दुइतर्फी ८० को हाराहारीमा उडान हुँदै आएकामा विश्वव्यापी कोरोना महामारीका कारण दैनिक ३० को हाराहारीमा मात्रै अन्तराष्ट्रिय उडान हुँदै आएको छ ।
नेपालसहित १५ मुलुकका ३० वटा वायुसेवाले विभिन्न २१ वटा अन्तराष्ट्रिय गन्तव्यका लागि उडान अनुमति लिए पनि थाइल्याण्डको थाई एयर, थाई लायन, हङकङको ड्रागन एयर, विमान बंगलादेश, मलेसियाको मालिन्दो र मलेसियन एयरले यात्रु अभावका कारण नियमित उडान भर्न नसकेको समाचार सोमबारको कान्तिपुर दैनिकमा रहेको छ ।
त्यस्तै भुटानको ड्रयुक एयर र भुटान एयरलाइन्स, चीनको एयर चाइना, चाइना स्र्टन, सिचुवान एयरलाइन्स, तिब्बत एयरलाइन्स, भारतको इण्डिगो र भिस्ताराले पनि नियमित उडान संचालन गरेका छैनन् ।