हामी सबैकाे संसारन्यूज

३ फागुन, काठमाडौं । अर्थ मन्त्रालयले वहुवर्षीय ठेक्काको स्वीकृति नदिएपछि सञ्चार तथा सूचना प्रविधि मन्त्रालय अन्तर्गतको सुरक्षण मुद्रण केन्द्रले पासपोर्ट र नोट नछाप्ने सामान्य खालको सुरक्षण मुद्रण (सेक्युरेटी प्रेस) किन्न बोलपत्र आव्हान गरेको छ । नोट र पासपोर्टजस्ता संवेदनशील कागजपत्र छाप्न सक्ने अत्याधुनिक सुरक्षण मुद्रण खरिद गर्न वहुवर्षिय ठेक्काका लागि केन्द्रले गतवर्ष अर्थमन्त्रालयसँग स्वीकृति मागेको थियो ।

अर्थ मन्त्रालयबाट बहुवर्षीय ठेक्काको स्वीकृति नपाएपछि तत्काल सामान्य खालको सरकारी कागजपत्र मात्रै छाप्न मिल्ने गरी सेक्युरेटी प्रेस किन्न लागिएको केन्द्रका कार्यकारी निर्देशक विकल पौडेलले जानकारी दिए । यो प्रेस स्थापना गरी परीक्षण सुरु गर्न एक वर्ष लाग्ने उनको भनाई रहेको पनि सोमबारको कान्तिपुर दैनिकमा समाचार छ ।

‘सेक्युरेटी प्रेस किन्ने भनेको तीन वर्ष भयो तर काम भएन,’ उनले भने, ‘ प्रेस स्थापनाका लागि जग्गा, भवन सबै उपलब्ध भइनसकेकाले सानैबाट भएपनि सुरु गर्न लागिएको हो ।’