हामी सबैकाे संसारन्यूज

३ फागुन, भक्तपुर । वासिङ मेसिनमा परी एक महिलाको मृत्यु भएको छ । भक्तपुरको सूर्यविनायक नगरपालिका ५ कटुञ्जेस्थित चुनदेवीमा रहेको लाइभ स्टार कपडा वासिङ सेन्टरको वासिङ मेसिनमा परी एक महिला मजदुरको मृत्यु भएको हो ।

महानगरीय प्रहरी परिसर भक्तपुरका अनुसार दोलखाको भीमेश्वर नगरपालिका ९ लाकुरीडाँडा घर भई हाल सोही वासिङ सेन्टरमा काम गर्ने ३८ वर्षीया कमला केसीको मृत्यु भएको हो ।

वासिङ मेसिनमा राख्ने केमिकल बनाउने क्रममा कमला अचानक वासिङ मेसिनभित्र परेकी थिइन् । वासिङ मेसिनमा परेर घाइते भएकी कमलालाई तत्काल उपचारको लागि मध्यपुर अस्पताल पु¥याउँदा मृत्यु घोषणा गरेको परिसरका प्रवक्ता प्रहरी नायब उपरीक्षक दीपक गिरीले बताए ।

उनका अनुसार कम्पनीका सञ्चालक साजन पराजुलीले कमलालाई वासिङ मेसिनमा परेर घाइते भई लडिरहेको अवस्थामा फेला पारेका थिए । कम्पनीका सञ्चालक पराजुलीले नै घाइते भई अचेत अवस्थामा फेला परेकी कमलालाई तत्काल उपचारको लागि मध्यपुर अस्पताल पठाएको प्रहरीलाई जानकारी गराइएको बताए ।

उनका अनुसार घटना सम्बन्धमा थप अनुसन्धान कार्य भइरहेको छ ।