हामी सबैकाे संसारन्यूज

फागुन ७, काठमाडौं । प्रचण्ड–नेपाल पक्षीय नेकपाको आकस्मिक केन्द्रीय समिति बैठक सुरु भएको छ । बैठक पार्टी केन्द्रीय कार्यालय पेरिसडाँडामा दिउँसो १ बजेदेखि सुरु भएको प्रचण्ड–नेपाल पक्षका स्थायी समिति गणेश शाहले जानकारी दिए ।

समूहले हिजो मात्रै सबै केन्द्रीय सदस्यलाई नागरिकतासहित केन्द्रीय कार्यालयमा उपस्थित हुन निर्देशन गरेको थियो । सोही निर्देशनअनुसार कार्यालय आएका सदस्यहरुका बीच बैठक आव्हान गरिएको जनाइएको छ ।

आकस्मिक बैठकका एजेण्डा यस्ता

नेता शाहका अनुसार आजको बैठकमा पछिल्लो राजनीतिक घटनाक्रम र पार्टीको आन्तरिक संगठन निर्माणका विषयमा छलफल हुने सम्भावना छ । पार्टी विभाजनसँगै रिक्त रहेका पदहरुमा नयाँ नियुक्तीबारे छलफल हुनसक्ने उनले बताए ।

यसअघि पार्टीको आन्तरिक सांगठनिक विषयमा सुझाब दिन पार्टी अध्यक्षसमेत रहेका नेता माधवकुमार नेपालको संयोजकत्वमा कार्यदल बनेको थियो । शाहले जनाएअनुसार आकस्मिक बैठकमा सोही कार्यदलले गरेको निर्णयबारे छलफल हुनसक्ने सम्भावना छ ।

प्रतिनिधि सभा विघटनविरुद्व आन्दोलनको घोषणा गरेको प्रचण्ड–नेपाल पक्षले पार्टी विभाजन यता सांगठनिक व्यवस्थापनामा भने ध्यान दिन सकेको छैन् । आन्दोलनमा होमिएको प्रचण्ड–नेपाल पक्षमा केन्द्रमा महासचिवदेखि जिल्ला तहसम्म नेतृत्व रिक्त छन् ।