Sansar News
९ फागुन, काठमाडौं । छुट्टाछुट्टै ठाउँमा बालुवाको ढिस्कोले पुरिएर तीन जनाको मृत्यु भएको छ ।
सुनसरी, बराहक्षेत्र नगरपालिका–८ सालबन्दीस्थित कोशी नदीको पोखरीको डिलमा खेल्ने क्रममा बालुवा र माटो सहितको ढिस्को झरेर सोही ठाउँ बस्ने बखत बहादुर राईको छोरा १४ वर्षीय प्रज्वल राईको शनिबार मृत्यु भएको छ ।
गम्भीर घाइते भएका प्रज्वलको बराहक्षेत्र नगर अस्पतालमा उपचारको क्रममा मृत्यु भएको हो । साथै उनका भाइ १० वर्षीय राजन राईलाई सोही अस्पताल हुँदै थप उपचारको लागि घोपा अस्पताल धरान पठाईएको छ ।
पाल्पा, पूर्बखोला गाउँपालिका–४ बलीपोखरा छेबकुनस्थित बालुका खानीमा बालुवा खन्ने क्रममा ढिस्कोले पुरेर सोही ठाउँ बस्ने १३ वर्षीया पबित्रा सारूको र ३६ वर्षीया माया देबी सिंहको मृत्यु भएको छ । पबित्रा सारूको घटनास्थलमै तथा माया देबीको उपचारको लागि स्थानीय मेडिकलतर्फ ल्याउनेक्रममा बाटोमै मृत्यु भएको हो ।
यस सम्बन्धमा स्थानीय प्रहरीले आवश्यक अनुसन्धान गरिरहेको जानकारी दिएको छ ।
वि.सं.२०७७ फागुन ९ आइतवार १२:३७ मा प्रकाशित
