हामी सबैकाे संसारन्यूज

१० फागुन, काठमाडौं । ऐक्यबद्धता प्रकाशनका अध्यक्ष निलकण्ठ तिवारीद्धारा वडा भवनका लागि नि:शुल्क जग्गा प्रदान भएको छ ।

गण्डकी प्रदेश पर्वत जिल्लाको पैयु गाउँपालिका ६ सरौखोलामा वडा कार्यालय भवन बनाउनका लागि तिवारीले सरौफांट सोताको १ रोपनी जमिन निःशुल्क प्रदान गर्ने घोषणा गरेपछि वडाले भवन निर्माण प्रक्रिया अघि बढाउने भएको हो ।

वडासचिव पाराश्वर सापकोटाका अनुसार स्थानीय, जनप्रतिनिधि, राजनैतिक दलका प्रतिनिधि र समाजसेवीहरुको उपस्थितिमा उनले सो घोषणा गरेका थिए ।

२०४६, २०५४ र २०५५ मा राजनैतिक कारणले जेल बसेका तथा २०५८ पछाडि पेशा छाडेर गणतान्त्रिक आन्दोलनका लागि भुमिगत भएका तिवारी हाल सामाजिक अभियानहरुमा बढि क्रियाशिल छन् । उनी दक्षिणी पर्वतमा भएको २०५७ को ऐतिहासिक हातेमालो श्रमशिविरका परिकल्पनाकार तथा कार्यक्रम संयोजक समेत रहेका थिए । उनी गैरआवासीय नेपाली पत्रकारिताका प्रवर्तक पनि हुन् ।

जग्गा घोषणा सम्बन्धमा मागिएको एक प्रतिक्रियामा तिवारीले ‘जग्गा र भूमि ब्यक्तिको नभएर राज्यको हुन भन्ने मान्यता संप्रेषण गर्न, संघियता र गणतन्त्रको मर्मबोधका साथ स्थानीय तह र वडालाइ भौतिक रुपले सहयोग गर्न तथा पारिवारीक सभ्यतालाइ नियमित गर्न’ आफुले सो जग्गा दान गरेको बताएका छन् ।