हामी सबैकाे संसारन्यूज

फागुन १९, काठमाडौं । नेपाल कम्युनिष्ट पार्टी (नेकपा)को प्रचण्ड–नेपाल समूहका नेता एवं प्रतिनिधि सभा सदस्य जनार्दन शर्मा प्रभाकरले पछिल्ला राजनीतिक घटनाक्रमप्रति स्वतन्त्र रुपमा छलफलमा जुट्न आव्हान गरेका छन् । उनले पार्टीगत छलफलसँगै स्वतन्त्र रुपमा सांसदको भूमिका निर्वाह गर्ने गरि छलफलमा जुट्न आव्हान गरेका हुन् ।

उनले कुनै पक्षको त्रास र प्रलोभनमा नपरी स्वतन्त्र छलफलमा जुट्नु पर्ने बताएका छन् । स्वतन्त्र रुपले आफ्नो बुझाई संसदमा राख्नु जनमतको सम्मान र आफ्नो जनप्रतिनिधिको कर्तव्यसमेत रहेको उनको भनाई छ ।

संसद बैठकको मिति नजिकिँदै जाँदा नेकपाको दुवै पक्ष (प्रचण्ड–नेपाल र ओली)ले सांसदहरु आफुँतर्फ तान्न अनेकन प्रलोभन दिने काम गरिरहेको छन् । यस्तोमा नेता शर्माले स्वतन्त्र रुपमा धारणा बनाउन छलफलमा जुट्न आग्रह गरेका हुन् ।

यस्तो छ उनको अपिल

नेपाल कम्युनिस्ट पार्टी (नेकपा) मा उत्पन्न विवादलाई सैद्धान्तिक कुरा, नेतृत्वको प्रश्न एवं पदीय झगडाका रुपमा आ-आफ्ना बुझाइ रहेका छन्।

जे भए पनि जननिर्वाचित संसदसमेत भंग हुने अवस्थासम्म पुग्नु हामी सबैका लागी दुर्भाग्यपूर्ण अवस्था हो। जनताको आन्दोलन र अदालतको स्वतन्त्र र सुझबुझपूर्ण निर्णयबाट संसदको पुन:स्थापना भएको सन्दर्भमा हामी प्रतिनिधिसभाका संसदहरुले आफैँप्रति उठेका प्रश्नहरुको जवाफ दिन आवश्यक भएको छ।

जनमतको सम्मान र आफ्नो जनप्रतिनिधिको कर्तव्यसमेत कसरी पूरा गर्ने भन्नेबारे स्वतन्त्र ढंगले छलफल गर्न आवश्यक भएको सन्दर्भमा सचिवालय सदस्यहरु बाहेकका सांसदहरूले एउटा छलफल गरी आवश्यक निष्कर्षका लागी पहल गर्ने कुराको महशुस गरी पार्टी, आन्दोलन र जनताको पक्षमा के गर्दा हुन्छ भन्नेबारे स्वतन्त्र रुपले छलफल गर्न माननीयहरुमा हार्दिक अपिल गर्दछु।

यो छलफल कुनै हस्ताक्षर र यो वा त्यो नेतृत्वको पक्षमा नभएर हाम्रो साझा सुझाव तयार गर्न अर्थमा भएकोसमेत जानकारी गराउँदछु। कुनै त्रास र कुनै प्रलोभनमा नपरी छलफल गरिने छ।