हामी सबैकाे संसारन्यूज

नैरोबी, केन्या । २१३ औं भानु जयन्तीको अवसरमा अन्तर्राष्ट्रिय नेपाली साहित्य समाज अफ्रिका महादेशीय च्याप्टरले अन्तर्राष्ट्रिय कविता प्रतियोगिता सम्पन्न गरेको छ ।

प्रतियोगितामा अमेरिकाकी कवियित्री जमुना भट्टराई प्रथम, द्वितीय सिन्धु पौडेल ( नेपाल ), तृतीय महेन्द्र भट्टराई (सेसेल्स) भएका छन् भने क्रमशः कवि मधु घिमिरे( अमेरिका) र कवियित्री बिष्णुमाया कट्टेल (सिक्किम , भारत ) ले सान्त्वना पुरस्कार प्राप्त गरेका छन् । कार्यक्रममा उत्कृष्ट १० कविताहरू प्रतियोगि कविहरूले वाचन गरेका थिए ।

कार्यक्रममा अन्तर्राष्ट्रिय नेपाली साहित्य समाज अफ्रिका महादेशीय च्याप्टरका उपाध्यक्ष पासाङ गोपर्मा शेर्पाको अध्यक्षतामा अनेसासका केन्द्रीय अध्यक्ष सर्वज्ञ वाग्लेको प्रमुख आतिथ्य, विशेष अतिथि अनेसास केन्द्रीय सल्लाहकार हिक्मत थापा र महासचिव राजु सिटौलाको उपस्थिति रहेकोे थियो भने कार्यक्रम अनेसास केन्द्रीय उपाध्यक्ष एवम् अनेसास अफ्रिकाका संस्थापक अध्यक्ष गणेश खड्काले संयोजन गरेका थिए ।

उक्त कार्यक्रममा प्रमुख अतिथि अनेसास केन्द्रीय अध्यक्ष सर्वज्ञ वाग्लेले अनेसास अफ्रिका च्याप्टरले किलिमन्जारो प्रकाशन र सम्पन्न गरेका अन्य राम्रा कामहरूको प्रशंसा गरेका थिए ।

विशेष अतिथि अनेसास सल्लाहकार हिक्मत थापाले अफ्रिका महादेशीय च्याप्टरको उन्नति प्रगतिमा अनेसास अफ्रिकाका सम्पूर्ण सदस्यहरूको उत्तिकै योगदान रहेको र आगामी दिनहरूमा नेपाली भाषा साहित्यका लागि अझ बढी योगदान गर्ने अपेक्षा रहेकोे बताए । साथै अनेसास केन्द्रीय उपाध्यक्ष गणेश खड्काले च्याप्टर स्थापना कालदेखि हालसम्म गरिएका कार्यहरु कदापि भुल्न नहुने बताए ।

कार्यक्रममा अनेसासका केन्द्रिय महासचिव राजु सिटौला, प्रमुख निर्णायक वरिष्ठ कवि सुबिद गुरागाई एवम् निर्णायक मण्डल सदस्य राज आशातित लगायत कवि तथा साहित्यकारहरुको उपस्थिति रहेको थियो ।

कार्यक्रममा स्वागत मन्तब्य सचिव भरत रिजाल र सहजिकरण महासचिव रामचन्द्र राईले गरेका थिए ।