Sansar News
२० फागुन, काठमाडौं । सरकारले नेकपा विप्लव समूहमाथि लगाएको प्रतिबन्ध फुकुवा गर्ने निर्णय गरेको छ । बिहीबार साँझ बसेको मन्त्रिपरिषद् बैठकले उक्त निर्णय गरेको हो ।
बिहान सरकारी वार्ता टोली र विप्लव समूहबीच बिहान भएको तीनबुँदे सहमति अनुसार विप्लव समूहमाथि लगाइएको प्रतिबन्ध फुकाउने निर्णय भएको एक मन्त्रीले जानकारी दिए ।
बिहान भएको तीन बुँदे सहमतिमा पक्राउ परेका विप्लव समूहका सम्पूर्ण बन्दीको रिहाइ र मुद्दा खारेजी गर्ने, विप्लव समूहले आफ्ना सम्पूर्ण राजनीतिक विषयहरुको समाधान संवादका माध्यमबाट गर्ने र नेपाल सरकारका तर्फबाट लगाइएको नेपाल कम्युनिष्ट पार्टी माथिको प्रतिबन्ध हटाउनेलगायतका सहमति भएका थिए ।
त्यसैगरी फागुन २१ गते आयोजित एक समारोहका विच सहमतिका विस्तृत विवरण सार्वजनिक गरिने बताइएको छ । सोहि समारोहलाई प्रधानमन्त्री केपी शर्मा ओली र नेकपाका महासचिव विप्लवले एउटै मन्चबाट सम्बोधन गर्ने सहमतिपछि जारी विज्ञप्तिमा जनाइएको छ ।
सरकारले २०७५ फागुन २८ गते विप्लव समूहमाथि प्रतिबन्ध लगाएको थियो ।
वि.सं.२०७७ फागुन २० बिहीवार १९:५४ मा प्रकाशित
