हामी सबैकाे संसारन्यूज

२८ फागुन, काठमाडौं । नेपाली सेनाले यौन प्रकरणमा मुछिएको प्रमाणित भएपछि एकजना बहालवाला सहायक रथी (जर्नेल) तथा महिला सैनिक अधिकृतसहित तीनजनालाई बर्खास्त गरेको छ ।

सेनाको २८ नम्बर बाहिनी सिराहाको बाहिनीपति (जर्नेल) पंकज कार्कीले संगठनभित्रै महिला सैनिक अधिकृतलाई यौन दुव्र्यवहार गरेको प्रमाणित भएपछि उनलाई बर्खास्त गरेको सैनिक उच्च स्रोतले जानकारी दिएको शुक्रबारको राजधानी दैनिकमा समाचार छ ।

यौन दुव्र्यहार गरेर बर्खास्त हुने कार्की पहिलो उच्च सैनिक हुन् ।

त्यस्तै सेनाले कार्कीसँग लागेकी एक सैनिक अधिकृत र अर्की एक महिला सैनिकलाई पनि आचरण ठिक नभएको भन्दै बर्खास्त गरेको छ ।

सैनिक उच्च स्रोतका अनुसार जर्नेल कार्कीमाथि यौन दुव्र्यवहारको आरोप लागेपछि सैनिक मुख्यालयले ‘कोर्ट अर्फ इन्क्वायरी’ गठन गर्दै छानविन थालेको थियो । इन्क्वायरीले कार्कीले महिला सैनिकमाथि यौन दुव्र्यवहार गरेको र ती महिला सैनिकको पनि आचरण खराब रहेको निष्कर्ष निकाल्दै उनीहरुमाथि मुख्यालय समक्ष कारबाहीको सिफारिस गरेको थियो ।