हामी सबैकाे संसारन्यूज

चैत २, काठमाडौं । नेकपा (एमाले)का वरिष्ठ नेता माधवकुमार नेपालले कार्यदल बनाएर पार्टीभित्रको विवाद समाधान खोज्न प्रस्ताव राखेका छन् । सोमबार पार्टी कार्यालय धुम्बाराहीमा प्रधानमन्त्री केपी शर्मा ओलीसँगको छलफलका क्रममा उनले यस्तो प्रस्ताव राखेका हुन् ।

तर, प्रधानमन्त्री ओलीले भने उनको प्रस्तावलाई अस्वीकार गरेका छन् । ओलीसँगको वार्तापछि सञ्चारकर्मीसँग कुराकानी गर्दै उनले फागुन २८ सम्मलाई शुन्य अवस्था मान्दै बाँकी विवादको हल कार्यदलमार्फत खोज्न प्रस्ताव राखेको बताए ।

‘२८ गतेको बैठकको वैधानिक छैन, त्यसलाई शून्य अवस्थामा पुर्‍याइदिऊँ, त्यसपछि सिंगो स्थितिको बारेमा बसेर छलफल गरौं, कार्यदल पनि बनाउन सकिन्छभन्दा त्यो स्वीकार्य भएन,’ नेता नेपालले भनेका छन् ।

आजको छलफलमा ओली पक्षले भने फागुन २८ को बैठक र त्यसका निर्णयलाई आत्मसात गरेर अगाडि बढ्नुपर्ने अडान राखेको थियो । बहुमत पक्षको निर्णय नै मान्य हुनुपर्ने ओली पक्षको अडान थियो ।

आजको बैठकमा ओली पक्षले आगामी चैत ७ मा बोलाएको बैठकमा सहभागी हुन माधव पक्षलाई आग्रह गरेको छ । तर, माधव पक्षले भने फागुन २८ को निर्णय फिर्ता बिना सम्भावना नरहेको स्पष्ट पारेको छ ।

सर्वोच्च अदालतको फैसलासँगै नेकपा (एमाले) पूर्ववत अवस्थामा फर्किएको थियो । पूर्ववत अवस्थामा फर्किए पनि एमालेभित्रको दुई पक्षले आ–आफ्नै भेला र बैठकहरु चलाउँदै आएका छन् ।

गत फागुन २८ मा ओलीले पक्षले केन्द्रीय समितिको बैठक बसाल्दै माधव पक्षका नेताहरुलाई जिम्मेवारीबाट मुक्त गराएको थियो । जसपश्चात माधव पक्षले समानान्तर कमिटीको घोषणा गर्दै राष्ट्रिय कार्यकर्ता भेलाको घोषणा गरेको थियो ।

माधव पक्षले समान्नान्तर कमिटीको घोषणा गरेसँगै दुई पक्षबीच छलफल भएको हो ।