Sansar News
३ चैत्र, काठमाडौँ । वरिष्ठ बामपन्थी बुद्धिजीवी प्राध्यापक माणिकलाल श्रेष्ठको निधन भएको छ ।
भेन्टिलेटरमा राखेर उपचार भइरहेको श्रेष्ठको उपचारकै क्रममा आज बिहान निधन भएको हो । करिब १ महिना अघि स्वास्थ्य स्थिति गम्भीर भएपछि आकस्मिकरूपमा मेडिसिटी अस्पताल भर्ना गरिएको थियो । केही दिनअघि मात्रै उनलाई मेडिसिटीबाट बाँसबारीस्थित शहीद गंगालाल हृदयरोग प्रतिष्ठानमा स्थानान्तरण गरिएको थियो ।
श्रेष्ठ लामो समयदेखि अस्वस्थ थिए । दुई वर्षअगाडि निमोनियालगायत अन्य विभिन्न सङ्क्रमणले ग्रस्त भएपछि लामो समयसम्म उनकाे अस्पतालमा भर्ना गरी उपचार गरिएको थियो । मिर्गौला रोगको कारण उनको नियमित रूपमा डाइलोसिस समेत गरिँदै आएको थियो ।
श्रेष्ठको जन्म विसं १९८९ आश्विन २७ गते पिता हिरालाल श्रेष्ठ र आमा लक्ष्मी कुमारी श्रेष्ठको कोखबाट भएको थियो । करिब १ वर्षअगाडि उनको श्रीमति सिलु सिंहको निधन भएको थियो ।
अंग्रेजी भाषमा एम.ए, बी.एस्सी, एल.एल.बी गरेका श्रेष्ठ नेपाल भाषाका ज्ञाता मानिन्छन् । उनका थुप्रै समालोचना, ऐतिहासिक तथा राजनीतिक निबन्धहरु प्रकाशित छन् ।
वि.सं.२०७७ चैत ३ मंगलवार १०:२१ मा प्रकाशित
