हामी सबैकाे संसारन्यूज

चैत ३, काठमाडौं । नेपाली कांग्रेसका वरिष्ठ नेता रामचन्द्र पौडेलले पार्टी सभापति शेरबहादुर देउवाको भूमिकाप्रति प्रश्न उठाएका छन् । सरकार गठबन्धनबारे माओवादी र जसपाले छलफल चलाईरहेको बेला देउवाले मौनता साँधेको भन्दै असन्तुष्टी जनाएका हुन् ।

उनले देउवाको मौनताका कारण ओलीले फाईदा लिएको पनि बताए । ‘हाम्रो सभापतिजीको अहिलेको उदासिनता भन्ने कि के भन्ने रहस्यमय लागिरहेको छ’, नेपाल प्रेस युनियन कास्कीले आयोजना गरेको कार्यक्रमलाई सम्बोधन गर्दै उनले भने, ‘यसले पार्टीलाई नै अनिर्णयको बन्दीजस्तो बनाएको छ ।’

उनले ओली सरकार जनताको निम्ति घातक रहेको भन्दै कांग्रेसकै नेतृत्वमा सरकार गठनको आवश्यकता रहेको बताए । माओवादी केन्द्र पनि मानेको र जसपा पनि कांग्रेसको भूमिका खोजीरहेको अवस्थामा कांग्रेसले अग्रसरता लिन नसक्नु गलत भएको उनको भनाई छ ।

उनले प्रदेश १ र बागमती प्रदेश सरकार अन्यौंलमा पुगेको भन्दै तत्कालै अविश्वासको प्रस्ताव ल्याएर भोट गर्ने अवस्था हुनुपर्ने माग गरे । प्रदेश सरकारबारे देउवाले देखाएको मौनताप्रति पनि उनको असन्तुष्टी छ ।