हामी सबैकाे संसारन्यूज

९ चैत, महेन्द्रनगर । भागरथी हत्या अभियोगमा पक्राउ परेका अभियुक्तले बयान फेरेका छन् ।

बैतडीको दोगडाकेदार गाउँपालिका ७ चडेपानीकी भागरथीको हत्या अभियोगमा पक्राउ परेका किशोरले अहिले भागरथीको हत्या आफुले नगरेको भन्दै बयान फेरेका हुन् ।

डोटीको सिलगढीमा रहेको सुधारगृहमा रहेका किशोरले आफ्ना बुवालाई यस्तो बताएपछि वुवा दीपक भट्टले आइतबार महेन्द्रनगरमा पत्रकार सम्मेलन गर्दै यस्तो बताएका हुन् ।

उनले घटनाको पुन अनुसन्धान गर्न माग गर्दै भने,‘भागरथीको हत्या गर्ने व्यक्तिलाई मैले चिनेको छु ।, विद्यालयबाट आउने बेला मैले बलात्कार गरिरहेको देखे ।’ छोराको भनाइ उद्धृत गर्दै किशोरका वुवा दीपकले भने, ‘कसैलाई भनिस् भने तेरो बुवा र भाइलाई पनि मारिदिन्छु भन्दै चक्कु देखाएर धम्की दिएपछि अपराध स्विकारेको हुँ ।’ सोमबारको अन्नपूर्णपोष्ट दैनिकमा समाचार छ ।

यसअघि सरकारी वकिलको कार्यालय र जिल्ला न्यायाधिशलाई भागरथीको हत्या र बलत्कार आफैले गरेको बयान दिएका थिए । त्यतिबेला बुवा दीपक पनि सँगै थिए ।

दीपकले हत्या र बलात्कारमा वडा कार्यालयका कर्मचारी संलग्न रहेको भन्दै नामै किटेर पत्रकार सम्मेलनमा बताए । ‘उसले (छोराले) एकजना वडा कार्यालयका कर्मचारीलाई चिने भन्छ, अर्को दारी पालेको तर मास्क लगाएको हुनाले चिनिन भन्छ ।’ उनले भने ।
शुक्रबार आफ्ना काका शंकरल भट्टलाई अभियुक्तले फोनमा यस्तो भनेपछि बुवासहितका आफन्त शनिबार सुधार गृहमा पुगेका थिए ।

तर सुदूरपश्चिम प्रदेश प्रहरी प्रमुख डीआइजी उत्तरमराज सुवेदीले बयान फेर्नुको कुनै औचित्य नभएको बताउँछन् । ‘प्रहरी अनुसन्धानमा सकिएको मुद्दा जिल्ला अदालतमा विचाराधीा छ, अब सबैकुरा अदालतको हातमा हुन्छ ।’ उनले भने ।