हामी सबैकाे संसारन्यूज

२७ चैत, काठमाडौँ । नेकापा एमालेले सार्वजनिक लेखा समितिमा गोकुल बाँस्कोटालाई सिफारिस गरेको छ । उनीसँगै रणनीतिक रूपमा महत्त्वपूर्ण मानिएका संघीय संसद्का विषयगत समितिहरुमा प्रधानमन्त्री केपी शर्मा ओलीनिकट सांसदको नाम सिफारिसमा परेको छ ।

सेक्युरिटी प्रिन्टिङ प्रेस खरिद प्रकरणमा लेखा समितिले नै बाँस्कोटालाई छानबिन गरेको थियो । बाँस्कोटा सञ्चार तथा सूचना प्रविधिमन्त्री भएका बेला सेक्युरिटी प्रिन्टिङ प्रेस खरिद प्रकरणमा उनको विवादित अडियो सार्बजनिक भएको थियो ।

लेखा समितिले खरिद प्रकरणमा त्रुटि रहेको भन्दै थप छानबिन गर्न अख्तियार दुरुपयोग अनुसन्धान आयोगलाई सिफारिस गरेको थियो । समितिले यससम्बन्धी छानबिनको प्रगति विवरण माग गर्दै केही महिनाअघि आयोगलाई पत्र समेत लेखेको थियो । उनीसँगै अन्य प्रकरणमा मुछिएका ओली निकट सांसद र उनका निकष्ट मानिएका व्यक्तिहरु सिफारिसमा परेका छन् ।

ओम्नी प्रकरणमा विवादित उपप्रधानमन्त्री ईश्वर पोखरेलका निकट राजेन्द्र गौतमलाई पनि लेखा समिति सदस्यमा राख्न एमाले संसदीय दलले बुधबार संसद् सचिवालयलाई सिफारिस गरेको छ ।

लेखा समितिमा अहिले एमालेका ११, कांग्रेसका ७, माओवादी केन्द्रका ४ र जनता समाजवादी पार्टीका ४ सांसद सदस्य छन् । यो समितिले यस्तै अरू अनियमिततामा छानबिन गर्ने भएकाले आफूअनुकूलका सांसदलाई प्रधानमन्त्री ओलीले सिफारिस गरेको अनुमान गरिएको छ ।