हामी सबैकाे संसारन्यूज

३ वैशाख, काठमाडौँ । भारतीय ख़ुफ़िया एजेन्सि(रअ)का प्रमुखसँग जोडिएर आएका समाचार भ्रमपूर्ण र निन्दनीय प्रचार भएको स्पष्ट पारिएको छ ।

प्रधानमन्त्रीका विदेश मामिला सल्लाहकार राजन भट्टराईले सामाजिक सञ्जाल मार्फत प्रधानमन्त्री केपी शर्मा ओली र रअ प्रमुखसँग ४ बुँदे सम्झौता भएको भनि केही संचारमाध्यममा आएको समाचार भ्रमपूर्ण र निन्दनीय प्रचार भएको बताएका छन् ।

‘भारतीय ख़ुफ़िया एजेन्सिका प्रमुखसंगको संझौताको रूपमा सम्माननीय प्रधानमन्त्रीको हस्ताक्षरको दुरूपयोग गरी केही अनलाईनमा प्रकाशित भ्रमपूर्ण प्रचार निन्दनीय छ’ भट्टराईले लेखेका छन् ।

विदेश मामिला जस्तो विषयमा खेलवाड नगर्न समेत आग्रह गर्दै उनले भनेका छन ‘बिदेश मामिला जस्तो संबेदनशिल बिषयमा गरिने यस्ता खेलवाड़प्रति सचेत हुन सबैमा आग्रह गर्दछु ।’

उज्यालो नेटवोर्कले ४ महिना अघि नेपाल आएका रअ प्रमुख सामन्तकुमार गोयलसँग प्रधानमन्त्रीले गोप्य रुपमा ४ बुँदे सम्झौता गरेको भन्दै दुवैको हस्ताक्षरित सम्झौता प्रकाशित गरेसँगै अरु अनलाइन मिडियाहरुले पनि समाचार बनाएका थिए ।