हामी सबैकाे संसारन्यूज

वैशाख ६, काठमाडौं । नेकपा (एमाले)का नेता विष्णु रिजालले कित्ता परिवर्तन गरेका छन् । उनी प्रधानमन्त्री केपी शर्मा ओली पक्षले बोलाएको सोमबारको दशौं महाधिवेशन आयोजक कमिटीको बैठकमा सहभागी भएका हुन् ।

ओली पक्षले बोलाएको बैठकलाई माधवकुमार नेपाल समूहले अवैधानिक भन्दै बहिस्कार गरेको छ । नेपाल समूहले बहिस्कार गरेको बैठकमा रिजाल उपस्थित भएका हुन् ।

जनाइएअनुसार आजको बैठकमा रिजालसहित नेपाल समूहका अर्का नेता सोम मिश्र पनि सहभागी भएका छन् ।

सर्वोच्च अदालतको आदेशसँगै ब्यूँतिएको नेकपा एमालेमा सुरुवातदेखि नै रिजाल नेपाल समूहमा देखिँदै आएका थिए । सामाजिक सञ्जालमा निकै सक्रिय रिजालले ओली पक्षका कदमहरुको विरोध गर्दै आएका थिए ।

तर, पछिल्लो केहि सातादेखि सामाजिक सञ्जालमा उनका अभिव्यक्तिहरु फेरिँदै आएका छन् । उनले एमाले मिल्नुपर्ने भन्दै ओली पक्षका कदमहरुलाई आलोचना गर्न बन्द गरेका छन् ।