वैशाख ८, काठमाडौं । नेकपा (एमाले)का अध्यक्ष एवं प्रधानमन्त्री केपी शर्मा ओली र वरिष्ठ नेता माधवकुमार नेपालबीच भेटवार्ता भएको छ । विभाजनको संघारमा पुगेको एमालेका दुई नेताबीच बुधबार साँझ राजधानीको मेरियट होटलमा भेटवार्ता भएको हो ।
झण्डै दुई घण्टासम्म चलेको भेटवार्तामा एमालेका अन्य नेताहरु पनि सहभागी भएका थिए । दुई नेताबीच वार्ता गराउन अर्थमन्त्रीसमेत रहेका नेता विष्णु पौडेलले मुख्य भूमिका खेलेको थिए ।
भेटवार्तामा के कुराकानी भयो भन्ने विषय भने बाहिर आएको छैन् । दुवै पक्षले भेटवार्ताबारे केहि खुलाएका छैनन् । भेटवार्तामा सहभागी नेता मोतिलाल दुगडले भने पत्रकारलाई वार्ता सकारात्मक भएको बताएका छन् ।
यसअघि बुधबार दिउँसो माधव पक्षीय नेता योगेश भट्टराईले प्रधानमन्त्री ओलीलाई भेटेरै वार्ता र छलफलबाट निकास खोज्न आग्रह गरेका थिए ।
सर्वोच्च अदालतको फैसलासँगै ब्यूँतिएको एमालेमा सुरुवातदेखि नै विवाद छ । फागुन २८ मा प्रधानमन्त्री ओलीले आफुँ पक्षीय केन्द्रीय समितिको बैठक राख्दै एकल रुपमा निर्णय गरेसँगै एमाले विभाजित अवस्थामा पुगेको थियो । ओली पक्षीय बैठकको निर्णयलाई काउण्टर गर्दै माधव पक्षले समानान्तर कमिटीको अभ्यास गरेको छ ।
पछिल्लो कर्णाली प्रकरणसँगै एमालेको विवाद फुटको स्थितिमा छ । कर्णाली घटनासँगै ओलीले माधव नेपालसहित उनी पक्षीय सबै सांसद र नेतामाथि कारबाही गर्ने योजनामा स्पष्टीकरण सोधेका छन् । ओलीले स्पष्टीकरणमा सबै नेतालाई पार्टीबाट निष्कासन गर्न नपर्नुको कारण माग गरेका छन् ।
वि.सं.२०७८ वैशाख ८ बुधवार २०:४३ मा प्रकाशित