हामी सबैकाे संसारन्यूज

वैशाख १२, काठमाडौं । नेकपा (एमाले)ले नेता माधवकुमार नेपालसहित उनी पक्षीय नेताहरुमाथि थप कारबाहीको तयारी गरेको छ । सरकारविरुद्व अविश्वासको प्रस्ताव ल्याउने तयारी भईरहेको बेला एमालेले दशौं राष्ट्रिय महाधिवेशन आयोजक कमिटीको आकस्मिक बैठक बोलाउँदै कारबाहीको तयारी गरेको हो ।

एमाले स्रोतले बताएअनुसार माधव पक्षले विपक्षी दलहरुलाई अविश्वासको प्रस्ताव ल्याए साथ दिने बचन दिएको कुरा बाहिरिएसँगै कारबाहीको तयारी गरिएको हो । जनाइअनुसार तत्काल माधव नेपालसहित केहि उनी पक्षीय केहि नेतामाथि निलम्बनको कारबाही हुनेछ ।

यसअघि माधव नेपालसहित उनी पक्षीय २७ प्रतिनिधि सभा सदस्य र ५ प्रदेशसभा सदस्यमाथि स्पष्टीकरण सोधिएको थियो । स्पष्टीकरण सोधिएका ४ प्रदेशसभा सदस्यलाई एमालेले पार्टी र सांसदबाट निष्कासन गरिसकेको छ ।

यसअघि कर्णाली प्रदेशसभामा भएको मतदानमा एमालेका ४ सांसदले फ्लोर क्रस गर्दै माओवादी नेतृत्वको सरकारलाई जोगाइदिएका थिए । पार्टी संसदीय दलको ह्वीप विपरित गरिएको उक्त कदम प्रतिनिधि सभा दोहोरिन सक्ने चिन्ता एमाले नेतृत्वमा छ ।

एमाले स्रोतले बताएअनुसार बालुवाटारमा अहिले पार्टी स्थायी समिति बैठक बसिरहेको छ । स्थायी समिति बैठक लगत्तै महाधिवेश आयोजक कमिटीको बैठक बसि थप निर्णय लिनेछ ।