Sansar News
१४, वैशाख, काठमाडौँ । नेकपा (माओवादी केन्द्र)ले आफ्ना सबै कमिटीमा ३५ प्रतिशत महिला अनिवार्य गर्ने निर्णय गरेको छ ।
मंगलबार पार्टी कार्यालय पेरिसडाँडामा बसेको बैठकले तत्कालै केन्द्रदेखि टोलतहसम्मका कमिटीमा ३५ प्रतिशत महिला, २० प्रतिशत युवा र १५ प्रतिशत दलित अनिवार्य गर्ने गरी केन्द्रीय समितिमा पेश गर्ने निर्णय गरेको हो ।
माओवादी केन्द्रको स्थायी कमिटीले पार्टीका सबै कमिटीमा कम्तीमा ३५ प्रतिशत महिला हुनुपर्ने निर्णयका साथै पार्टीको सबै समितिका पदाधिकारीमा एक जना महिला अनिवार्य राख्ने पनि बैठकले निर्णय गरेको प्रवक्ता नारायण काजी श्रेष्ठले जानकारी दिए । त्यस्तै २० प्रतिशत युवा (४० वर्षभन्दा कम) लाई अनिवार्य समावेश गरिनेका साथै केन्द्रिय कमिटीमा १५ प्रतिशत र तल्लो कमिटीमा २ प्रतिशत दलित समुदायबाट समाबेश गरिने निर्णय पनि बैठकले गरेको छ ।
त्यस्तै अन्तरिम विधानअनुसार अध्यक्ष, उपाध्यक्ष, महासचिव, सचिव र कोषाध्यक्ष रहेको पदाधिकारी सहित २९९ सदस्यीय केन्द्रीय कमिटी बनाउने भएको छ ।
बैठकले कोभिड–१९ विरुद्धको अभियानका लागि सर्वपक्षीय राजनीतिक संयन्त्र बनाउन माग गरेको पनि प्रवक्ता श्रेष्ठले बताए ।
वि.सं.२०७८ वैशाख १४ मंगलवार २१:०५ मा प्रकाशित
