हामी सबैकाे संसारन्यूज

१९ बैशाख, पोखरा । गण्डकी प्रदेशमा शुक्रबार, शनिबार र आइतबार तीनदिनमै ८ कोरोना संक्रमितको मृत्यु भएको छ ।

प्रदेश स्वास्थ्य निर्देशनालयका अनुसार प्रदेशमा शुक्रबार शनिबार र आइतबार पोखरा महानगरपालिका १६ का ७७ वर्षीय पुरुषको मृत्यु भएको छ । बैशाख १६ गते कोरोना संक्रमण पुष्टि भएका उनको शनिबार दिउँसो १ः१७ मा होम आइसोलेशनमा मृत्यु भएको हो ।

त्यस्तै महानगर–२६ की ५८ वर्षीया महिलाको पनि उपचारका क्रममा शनिबार बिहान १०ः३० बजे मणिपाल अस्पतालमा उपचारका क्रममा मृत्यु भएको छ । उनमा बैशाख १५ गते कोरोना संक्रमण पुष्टि भएको थियो ।

पर्वत कुश्मा नगरपालिका ५ की ७६ वर्षीया महिलाको गण्डकी मेडिकल कलेज पोखरामा उपचारका क्रममा मृत्यु भएको छ । उनमा १७ गते कोरोना संक्रमण पुष्टि भएको थियो ।

त्यस्तै दाङको राप्ति गाउँपालिका ५ का ४३ वर्षीय पुरुषको पनि गण्डकी मेडिकल कलेजमा उपचारका क्रममा मृत्यु भएको छ । बैशाख १५ गते कोरोना संक्रमण पुष्टि भएका उनको बैशाख १७ गते मृत्यु भएको हो ।

पोखरा महानगरपालिका १६ की ७३ वर्षीया महिलाको पनि उपचारका क्रममा मृत्यु भएको छ । बैशाख १२ गते कोरोना संक्रमण पुष्टि भएकी उनको मेडिप्लस अस्पतालमा उपचारका क्रममा शनिबार बिहान ४ः१३ मा मृत्यु भएको हो ।

पोखरा महानगर १० की एक महिलाको पनि मणिपाल शिक्षण अस्पतालमा उपचारका क्रममा मृत्यु भएको छ । १६ गते कोरोना संक्रमण पुष्टि भएकी उनको शनिबार बेलुका ५ः२४ मा मृत्यु भएको पनि प्रदेशको स्वास्थ्य निर्देशनालयले जनाएको छ ।

पोखरा महानगर १९ का ५४ वर्षीय पुरुषको पनि गण्डकी मेडिकल कलेजमा उपचारका क्रममा शनिबार बेलुका ७ः३० मा मृत्यु भएको छ । उनमा १८ गते नै कोरोना संक्रमण पुष्टि भएको थियो ।

त्यसैगरी बुटवल उपमहानगरपालिका ३ का ७५ वर्षीय पुरुषको पनि मृत्यु भएको छ । उनको आइतबार बिहान १०ः३२ मा मेडिप्लस अस्पतालमा उपचारका क्रममा मृत्यु भएको हो । उनमा बैशाख ९ गते कोरोना संक्रमण पुष्टि भएको थियो ।