Sansar News
वैशाख २२, काठमाडौं । प्रधानमन्त्री एवं नेकपा (एमाले)का अध्यक्ष केपी शर्मा ओली विपक्षी दल कांग्रेसका सभापति शेरबहादुर देउवालाई भेट्न बुढानिलकण्ठ पुगेका छन् । उनी उपप्रधानमन्त्री ईश्वर पोखरेल, गृहमन्त्री रामबहादुर थापा बादल, संसदीय दलका उपनेता सुवासचन्द्र नेम्वाङसहित देउवा निवास पुगेका हुन् ।
कांग्रेसका मुख्यसचिव कृष्णप्रसाद पौडेलले जानकारी दिएअनुसार अहिले ओली र देउवाबीच छलफल चलिरहेको छ ।
प्रधानमन्त्री ओलीले आगामी वैशाख २७ मा विश्वासको मत लिने तयारी गरेका छन् । जसको लागि संसद अधिवेशनसमेत आव्हान गरिएको छ ।
भेटमा पछिल्लो राजनीतिक अवस्थाबारे छलफल भईरहेको बताइएको छ ।
बुधबार मात्रै विपक्षी कांग्रेससहितको गठबन्धनले राष्ट्रिय सभा सदस्यको लागि बागमती र लुम्बिनीबाट साझा उम्मेदवार बनाउने निर्णय गरेको थियो । ओलीको टोलीसहितको भेटलाई अर्थपूर्णं रुपमा हेरिएको छ ।
वि.सं.२०७८ वैशाख २२ बुधवार १६:५२ मा प्रकाशित
