Sansar News
जेठ २०, काठमाडौं । पूर्वराजा ज्ञानेन्द्र शाहले कोरोना महामारी नियन्त्रणका लागि सबैले संकल्प गर्नुपर्ने बताएका छन् । कोरोना संक्रमण मुक्त भएपश्चात भिडियो सन्देश जारी गर्दै उनले सबैको हातेमालो आवश्यक रहेको बताए ।
उनले महामारीको पछिल्लो अवस्थाले निकै चिन्तित बनाएको पनि बताएका छन् ।
रानी कोमल राज्यलक्ष्मीदेवीसँगै बसेर जारी गरेको भिडियो सन्देशमा उनले भनेका छन्, ‘हामी दुवै पूर्ण स्वास्थ्य लाभको प्रक्रियामा छौँ । तर देश भित्र र बाहिर महामारीको अवस्थाले हामीलाई चिन्तित बनाएको छ । यो महामारीसँग जुध्नका लागि हाम्रो आन्तरिक पहल र बाह्य सहयोगको खाँचो छ ।’
शाहले आफूहरूको स्वास्थ्यबारे चिन्ता र चासोका साथ शुभकामना दिने सबैप्रति आभार प्रकट पनि गरेका छन् । उनले महामारीमा नियन्त्रणमा खटिएका सबैप्रति धन्यवाद व्यक्त गरेका छन् ।
पूर्वराजा ज्ञानेन्द्रले सबैलाई सुरक्षित भएर स्वस्थ रहन पनि आग्रह गरेका छन् । ‘म तपाईंहरू सबैलाई सुरक्षित, सावधान र स्वस्थ रहन आग्रह गर्दछु,’ उनले भनेका छन् ।
यस्तो छ भिडियो सन्देश
वि.सं.२०७८ जेठ २० बिहीवार १४:४६ मा प्रकाशित
