Sansar News
जेठ २०, काठमाडौं । नेकपा (एमाले)को माधवकुमार नेपाल समूहका केन्द्रीय सदस्यहरुले पार्टी अध्यक्ष केपी शर्मा ओलीले एमालेलाई एकताबद्ध बनाउनै नचाहेको बताएका छन् । बिहिबार पछिल्लो राजनीतिक घटनाक्रमबारे छलफल गर्न आयोजना गरिएको भर्चुअल केन्द्रीय कमिटी बैठकमा उनीहरुले ओलीको विश्वास गर्न नसकिने बताएका हुन् ।
दुई पक्षबीचको वार्तालाई पनि दाउपेचको रुपमा ओलीले प्रयोग गर्न खोजेको नेताहरुको धारणा छ । वार्तामा सहभागी नेता सुरेन्द्र पाण्डेले नै ओलीसँग विश्वास गर्न नसकिने बताएको एक केन्द्रीय सदस्यले बताए ।
‘कुरा मिल्ला भनेर वार्ता बस्यौं तर उहाँहरुले यसलाई दाउपेचको मुद्दा मात्रै बनाउन खोज्नुभयो’, पाण्डेको भनाई उद्र्धत गर्दै एक नेताले भने ।
बैठकमा नेताहरुले पार्टी पुनर्गठनलाई प्राथमिकता दिएर अगाडि बढ्नुपर्ने बताएका छन् । वार्तामा सहभागी नेताहरुले नै ओलीसँग सहकार्य सम्भव नदेखिएको कुरा बैठकमा राखेको एक केन्द्रीय सदस्यले बताए ।
भर्चुअल बैठकमा ओली समूहका नेताहरुसँग वार्तामा रहेका नेता घनश्याम भुसाल, सुरेन्द्र पाण्डे, योगेश भट्टराई र गोकर्ण विष्टसँग केन्द्रीय नेताहरुले धेरै प्रश्न उठाएका छन् । जसको जवाफ उनीहरुले दिने बताइएको छ ।
बताइएअनुसार कतिपय केन्द्रीय सदस्यले वार्ताप्रति नै शंका व्यक्त गरेका थिए । भर्चूअल बैठक करिब ७५ जना केन्द्रीय सदस्य जोडिएर छलफल गरेको बताइएको छ ।
वि.सं.२०७८ जेठ २० बिहीवार १६:०६ मा प्रकाशित
