हामी सबैकाे संसारन्यूज

२४ जेठ, काठमाडौं ।राष्ट्रिय मानव अधिकार आयोगले यौन दुव्र्यवहार परेका राउटे युवतीहरुको जीवन रक्षा तथा गोपनियताको सुरक्षा गर्दै दोषीहरुमाथि कडा कारबाही गर्न माग गरेको छ ।

सुर्खेतको गुर्भाकोट नगरपालिका ९ का युवाहरुले स्थानीय राउटे समुदायका युवतीहरुलाई प्रलोभनमा पारेर मदिरा सेवन गराई यौन दुव्र्यवहारमा परेको भन्ने समाचारप्रति गम्भीर ध्यानाकर्षण भएको जनाउँदै आयोगले ती युवतीहरुको गोपनियताको सुरक्षा गर्दै स्वास्थ्य परीक्षण र भौतिक सुरक्षा गरी जीवन रक्षाको लागि तत्काल पहल गर्न सरकारसँग माग गरेको छ ।

‘स्थानीय तीनजना युवाहरुले राउटे समुदायका दुई युवतीहरुलाई प्रलोभनमा पारी स्थानीय होटलमा लगेर यौनजन्य कार्य गर्न बाध्य बनाएको, उक्त घटनाका कारण निज युवतीहरुलाई राउटे समुदायले अस्वीकार गर्ने सम्भावना देखिएको र उनीहरुको ज्यान नै जोखिममा पर्नसक्ने अनुगमनबाट पाइएको छ,’ आयोगका सहसचिव तथा प्रवक्ता टिकाराम पोखरेलद्धारा जारी विज्ञप्तिमा भनिएको छ, ‘प्रलोभनमा परी यौनहिंसामा लगाइएका उल्लेखित युवतीहरुलाई यसअघि राउटे मुखियाले ४ महिना नजरबन्द जस्तै गरी बन्दी बनाइएको जानकारी प्राप्त भएको छ ।’

युवतीहरुमाथि भएको यौनहिंसाको घटना बारे आयोगको प्रदेश शाखा कार्यालय जुम्लाले अनुगमन गरेको थियो । आयोगले प्रभावकारी अनुसन्धान गरी दोषीलाई कानूनी कारबाहीको दायरामा ल्याउन सरकारसँग माग गरेको छ ।

राउटे युवतीमाथि दुव्र्यवहार गर्ने दोषीलाई हदैसम्मको कारबाही गर्न पालिकाको माग