हामी सबैकाे संसारन्यूज

१ असार, काठमाडौँ । प्रसिद्ध धार्मिक स्थल सेतीवेणी उच्च जोखिममा परेकाे छ ।

गण्डकी प्रदेश र लुम्बिनी प्रदेशको संगममा रहेको सेतीवेणीमा पानीको सतह ह्वात्तै बढेको छ । पानीको सतह बढेसँगै बजारमा पानी पस्न थालेसँगै वरपरका क्षेत्रमा सर्तक रहन भनिएको छ ।

देशभरी मनसुनी वायुको प्रभाव रहेको छ । केही दिनयता देशभर परेको भारी वर्षाका कारण नदिनालाको सतह बढ्ने र पहिरोको जोखिम बढ्दै गएको छ ।

बिहान ८.३० बजे बढीगाड नदी रुद्रबेनी जलमापन केन्द्र, पाल्पामा जलसतहले सतर्कता तह पार गरेको र बढ्दो क्रममा रहेको जल तथा मौसम विज्ञान विभागको बाढी पूर्वानुमान महाशाखाले जनाएको छ । उक्त नदी जलाधारमा थप बर्षा हुने सम्भावना भएकाले तटिय क्षेत्रमा आज राति सम्मै उच्च सतर्कता अपनाउन आग्रह गरिएको छ ।

कास्कीको लुम्ले र म्याग्दीको घोरेपानी बर्षामापन केन्द्रमा पछिल्लो ६ घण्टा भारी बर्षामापन भएको तथा सो क्षेत्रमा थप बर्षा हुने सम्भावना रहेकाले साना खोलामा आकस्मिक बाढी आउन सक्ने र कमजोर तथा भिरालो जमीनमा पहिरो जान सक्ने भएकाले आज राती सम्मै उच्च सतर्कता अपनाउन भनिएको छ ।

त्यस्तै चितवनको चरछरे, म्याग्दीको घोरेपानी र नवलपरासीको अरुण खोला स्टेशनमा भारी वर्षा मापन भएकाले खतराको संकेत स्वरुप साइरन बजाइएको छ ।

जल तथा मौसम विज्ञान विभागले बिहान जारी गरेको सूचनामा हाल देशभर सामान्य देखि पूर्ण बदली रही गण्डकी, लुम्बिनी प्रदेश, र सुदुरपश्चिम प्रदेशका केही र बाँकी प्रदेशका थोरै स्थानहरुमा हल्का देखि मध्यम वर्षा भईरहेको छ । प्रदेश नं. २ को थोरै स्थानमा मेघगर्जन र चट्टयाङ्ग सहित वर्षा भईरहेको छ ।

आज कोशी र यसका सहायक नदीमा बहाब सामान्य रहने नारायणी, कर्णाली र महाकाली जलाधारका केही स–साना सहायक नदीमा क्षणिक मध्यम र भारी बार्षा भई बहाब केही बढ्ने र केही स–साना नदीमा बहाब सर्तकता तह आसपास पुग्न सक्ने पूर्वानुमान गरेको छ ।

त्यस्तै देशका धेरै स्थानहरुमा मेघगर्जन र चट्याङ्ग सहित हल्का देखि मध्यम वर्षाका साथै प्रदेश न. २, बाग्मती प्रदेश, गण्डकी प्रदेश, लुम्बिनी प्रदेश तथा कर्णाली प्रदेशका केही स्थानहरुमा भारी बर्षाको समेत सम्भावना देखिएकोले आवश्यक सतर्कता अपनाउनु हुन अनुरोध गरेको छ ।

मौसम पूर्वानुमान महाशाखाका अनुसार आज दिउँसो देशभर सामान्य देखि पूर्ण बदली रहनेछ । देशका धेरै स्थानहरुमा मेघगर्जन र चट्टयाङ्ग सहित हल्का देखि मध्यम वर्षाको सम्भावना रहेको छ । प्रदेश नं २, बाग्मती प्रदेश, गण्डकी प्रदेश, लुम्बिनी प्रदेश तथा कर्णाली प्रदेशका केही स्थानहरुमा भारी बर्षाको समेत सम्भावना छ ।

राती देशभर सामान्य देखि पूर्ण बदली रहनेछ । देशका धेरै स्थानहरुमा मेघगर्जनरचट्टयाङ्ग सहित हल्का देखि मध्यम वर्षाको सम्भावना रहेको छ । गण्डकी प्रदेश, लुम्बिनी प्रदेश तथा कर्णाली प्रदेशका थोरै स्थानहरुमा भारी बर्षाको समेत सम्भावना छ ।

महाशाखाले असार ३ गतेसम्म कालीगण्डकी, तिनाउ, पश्चिम राप्ती, बबई, भेरी र यसका सहायक नदी लगायत लुम्बिनी, कर्णाली, सुदूरपश्चिम प्रदेशको चुरे, तराई भई बहने केही साना नदी नजिकको क्षेत्रमा पनि विशेष सावधानी अपनाउन आग्रह गरेको छ । ती नदीहरुमा बहाव बढ्ने र बाढीको सतह सतर्कता आसपास पुग्न सक्ने महाशाखाले पूर्वानुमान गरेको छ ।