हामी सबैकाे संसारन्यूज

असार ३, काठमाडौं । नेपाली कांग्रेसको केन्द्रीय कार्यसमिति बैठक आज बस्ने भएको छ । बैठक पार्टी कार्यालय सानेपामा दिउँसो २ बजेदेखि बस्ने तय भएको जनाइएको छ ।

यसअघि पार्टी केन्द्रीय कार्यालयले सूचना जारी गरी सबै केन्द्रीय सदस्यहरुलाई बैठकमा सहभागी हुन आग्रह गरेको थियो।

यस्ता छन् बैठकका एजेण्डा

कांग्रेस केन्द्रीय समिति सदस्य डा. डिला संग्रौलाका अनुसार पछिल्लो राजनीतिक घटनाक्रम र महाधिवेशनबारे छलफल गर्न बैठक बोलाइएको हो ।

बैठकले महाधिवेशनको समय तालिका परिवर्तन गर्ने बताइएको छ।

यसअघि गत शनिबार बसेको पार्टीका पदाधिकारीको बैठकले आसन्न १४औं महाधिवेशनको मिति सार्ने निर्णय गरेको थियो। यसअघि भदौ ७ देखि १० सम्मका लागि तोकिएको महाधिवेशन भदौ १६ गतेबाट सुरु गर्ने निर्णय पदाधिकारी बैठकले गरेको थियो।

नेतृ संग्रौलाका अनुसार बैठकमा बाढी पहिरोले भएको धनजनको क्षति र राहतको विषयमा पनि छलफल हुनेछ ।