Sansar News
असार १५, काठमाडौं । नेपाली कांग्रेसका उपसभापति विमलेन्द्र निधि, महामन्त्री डा. शशांक कोइराला र पूर्वमहामन्त्री प्रकाशमान सिंहबीच तेस्रो चरणको ‘लञ्च मिटिङ’ भएको छ । पूर्वमहामन्त्री प्रकाशमान सिंह निवास चाक्सीबारीमा नेतात्रयबीच तेस्रो चरणको लञ्च मिटिङ भएको हो ।
यसअघि असार ७ मा उपसभापति निधि निवास बानेश्वर र असार ११ मा महामन्त्री कोइराला निवास महाराजगञ्जमा तीन नेताबीच लञ्च मिटिङ्ग भएको थियो । नेताहरुबीच १४ औं महाधिवेशन केन्द्रित रहेर लञ्च मिटिङ्ग भएको हो ।
१४ औं महाधिवेशनको मिति तय भएसँगै कांग्रेसमा सम्भावित उम्मेदवारहरुले सक्रियता बढाईरहेका बेला मुख्य दुई पक्षमा खुल्दै आएका तीन नेताहरुको छलफललाई भने निकै अर्थपूर्णं रुपमा लिन सकिन्छ ।
पार्टी सभापति शेरबहादुर देउवा पुनः सभापतिमा दोहोरिने तयारी गरेसँगै दोस्रो तहका नेताहरु नयाँ समिकरण निर्माणका लागि अगाडि देखिएका हुन् । तीन नेताले नै सभापतिको दाबी गरिरहेका बेला तेस्रो चरणमा भएको छलफल निष्कर्ष उन्मुख बनेको देखिएको छ ।
यसअघि नेताहरुले आफुँहरुभित्रैबाट सहमतीमा एक जना उम्मेदवार बन्ने घोषणा सार्वजनिक रुपमै गरेका थिए । तीन नेताहरुको यो छलफललाई कांग्रेसको बलियो समिकरण निर्माणको सुरुवातको रुपमा हेरिएको छ ।
वि.सं.२०७८ असार १५ मंगलवार १३:३७ मा प्रकाशित
