Sansar News
असार १६, काठमाडौं । नेकपा (एमाले)को दशौं राष्ट्रिय महाधिवेशन आयोजक कमिटीको अन्तिम बैठक प्रधानमन्त्री निवास बालुवाटारमा जारी छ । यो बैठकले दशौं राष्ट्रिय महाधिवेशन आयोजक कमिटीलाई खारेज गरी केन्द्रीय कमिटीमा रुपान्तरण गर्नेछ ।
सर्वोच्च अदालतको आदेश र माधवकुमार नेपाल पक्षको मागअनुसार आयोजक कमिटीलाई खारेज गर्न लागिएको हो ।
सर्वोच्च अदालतले ०७७ फागुन २३ मा नेपाल कम्युनिष्ट पार्टी (नेकपा)लाई बदर गर्दै एमाले र माओवादीलाई साबिक अवस्थामा फर्काएको थियो । सोअनुसार ब्यूँतिएको एमालेमा अध्यक्ष केपी शर्मा ओलीले भने एक पक्षीय रुपमा पार्टीभित्र निर्णयहरु गर्दै लगेका थिए ।
उनले माधव पक्षलाई पाखा पन्छाउँदै महाधिवेशनको मिति घोषणा गर्दै आयोजक कमिटीको निर्माण गरेका थिए । तर गत जेठ २७ मा अदालतले अन्तरिम आदेशमार्फत ओलीले गठन गरेको आयोजक कमिटीलाई अवैद्य भएको ठहर गरेको थियो ।
आयोजक कमिटीको बैठकलाई माधव नेपाल पक्षले भने बहिस्कार गरेको छ । माधव पक्षले आयोजक कमिटी खारेज गर्ने निर्णयलाई पनि शंकापूर्णं रुपमा हेरेको छ ।
वि.सं.२०७८ असार १६ बुधवार १४:०८ मा प्रकाशित
