हामी सबैकाे संसारन्यूज

१७ असार, काठमाडौं । यातायात व्यवस्था विभागले आगामी साउनदेखि ट्रायल पास गरेकै दिन परिक्षणकालीन लाइसेन्स वितरण गर्ने भएको छ । स्मार्ट लाइसेन्स छपाइका लागी कार्ड सकिएपछि त्यसको विकल्पमा विभागले अस्थाई लाइसेन्स दिन लागेको हो ।

विभागले जनाएअनुसार स्मार्ट लाइसेन्सको विकल्पमा दिन लागिएको यो परिक्षणकालीन लाइसेन्सको अवधि १ बर्षको हुनेछ । यदि परिक्षणकालिन लाइसेन्स लिएर एक बर्षको अवधिमा पाँचपटकसम्म कारबाहीमा परे पुनः शुरूदेखि परीक्षा दिनुपर्ने विभागले जनाएको छ ।

लाईसेन्समा क्युआर कोडसमेत
यातायात विभागले यो कार्डमा क्युआर कोडसमेत राखेको हुन्छ । जसलाई ट्राफिक प्रहरीले स्क्यान गरेर चालकको विवरण हेर्न सक्छ ।

यस अघि ट्रायल पस गरेको दिन सेवाग्राहीलाई रसिद दिइने गरेको थियो । तर, अब भने जहाँ ट्रायल परिक्षा पास गरेलगतै अस्थायी प्रकृति लाइसेन्स दिइनेछ ।

विभागका अनुसार अगामी साउन १ गतेबाट वितरण गर्ने गरी उपत्यकाका यातायात कार्यालयहरुले उक्त परिक्षणकालिन लाइसेन्स छपाइ गर्ने मेसिन खरिद गरिसकेका छन ।

परिक्षणकालीन लाइसेन्स पाउनेले ५ पटकसम्म कारवाहीमा नपरेको खण्डमा स्मार्ट लाइसेन्स पाउने बताइएको छ । विभागले जेठबाटै लागू गर्ने भने पनि कोरोना भाइरसको दोस्रो लहरका कारण देशव्यापी निषेधाज्ञा भएपछि प्रक्रिया पछि धकेलिएको थियो ।