Sansar News
२१ असार, काठमाडौं । प्रतिनिधिसभा विघटन सम्बन्धी परेको रिटको फैसला असार २८ गते आउने भएको छ ।
सोमबार प्रधान न्यायाधिश चोलेन्द्र समशेर राणाले उक्त मुद्दालाई हेर्दाहेदैमा राख्दै अर्को पेशी असार २८ गतेका लागि तोकेका हुन् । सम्भवत असार २८ गते उक्त मुद्दाको फैसला आउने बताइएको छ ।
उक्त मुद्दामा रिट निवेदक र विपक्षी तर्फका वकिलको बहस सकिएको छ । सोमबारको बहसमा रिट निवेदक शेर बहादुर देउवाका वकिलहरुले जवाफी बहस गरेका थिए भने आजै एमिकस क्युरीका चार जनाले पनि बहस गरेका थिए ।
प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले दोस्रो पटक जेठ ७ गते प्रतिनिधिसभा विघटन गर्दै कार्तिक २६ र मंसिर ३ गते प्रतिनिधिसभाको निर्वाचनको घोषणा गरेकी थिइन् ।
वि.सं.२०७८ असार २१ सोमवार १९:०४ मा प्रकाशित
