हामी सबैकाे संसारन्यूज

२४ असार, काठमाडौँ । सेमिफाइनल खेलमा डेनमार्कलाई पराजित गर्दै इंग्ल्यान्ड युरो २०२० को फाइनलमा प्रवेश गरेको छ । बिहीबार विहान सम्पन्न भएको खेलमा डेनमार्कलाई २-१ गोलले पराजित गर्दै इंग्ल्यान्ड प्रतियोगिताको फाइनलमा पुगेको हो ।

खेलको ३० औँ मिनेटमा मिक्केल डमसगार्डले गोल गर्दै डेनमार्कलाई अग्रता दिलाएका थिए । खेलको ३९ मिनेटमा डेनमार्कले आत्मघाती गोल गर्न पुगेको थियो । बुकायो साकाको क्रस रोक्ने क्रममा डेनमार्कका कप्तान साइमन केजार आफ्नै पोस्टमा गोल गर्न पुगेका थिए ।

निर्धारित समयको खेल १-१ गोलको बराबरीमा सकिएपछि ३० मिनेटको अतिरिक्त समयमा गोल गर्दै इंग्ल्यान्डले जित निकालेको हो । खेलको १०४ औँ मिनेटमा ह्यारी केनले पेनाल्टी मार्फत गोल गर्दै इंल्याण्डलाई खेलमा अग्रता दिलाएका थिए ।

जितसँगै इंग्ल्यान्ड ५५ वर्षपछि कुनै मुख्य प्रतियोगिताको फाइनलमा पुगेको छ । अब उपाधिका लागि इंग्ल्यान्डले आइतबार राति इटालीसँग प्रतिस्पर्धा गर्नेछ।