Sansar News
असार २७, काठमाडौं । नेकपा (एमाले)का वरिष्ठ नेता माधवकुमार नेपालले सर्वोच्च अदालतलाई प्रभावित पार्ने भाषा प्रयोग गरि सहमती नगर्न कार्यदलका सदस्यलाई सुझाब दिएका छन् । पार्टी विवादमा समाधानको प्रयास भईरहेका बेला आफुँ निकटका कार्यदल सदस्यहरुलाई बोलाएर नेता नेपालले यस्तो सुझाएका हुन् ।
नेता नेपालले अदालतलाई प्रभावित बनाउने खालको भाषा राखेमा स्वीकार्य नहुने पनि बताएका छन् । उनले अदालतलाई निष्पक्ष फैसला गर्न दिनुपर्ने लाईनमा आफुँ रहेको बताएका थिए ।
आइतबार बिहान सिंहदरबारमा बैठक बस्नुअघि नेपालनिकट कार्यदलका सदस्यहरुलाई उनलाई कोटेश्वरस्थित निवासमा पुगेर भेटेका थिए । नेपाल पक्षीय कार्यदलका सदस्यहरु कोटेश्वरबाट फर्किएपश्चात मात्रै सिंहदरबारमा कार्यदलको बैठक सुरु भएको थियो ।
कार्यदलका सदस्यहरुले आजै अन्तिम सहमति गर्न सक्ने सम्भावना रहेको बताएका छन् । तर, नेता नेपालको अदालतमा बुझाएको हस्ताक्षर फिर्ता नलिने अडानले सहमतिलाई प्रभावित पार्न सक्ने सम्भावना रहेको बताइएको छ ।
नेपाल समूहका २३ जना विघटित प्रतिनिधि सभा सदस्यसहित विपक्षी गठबन्धनले प्रतिनिधि सभा विघटन र शेरबहादुर देउवालाई प्रधानमन्त्री बनाउनुपर्ने माग राख्दै सर्वोच्च रिट हालेको थियो । विपक्षी गठबन्धनबाट दायर रिटमाथि सुनुवाई सकिएसँगै भोली (सोमबार)को लागि अर्को पेसी तोकिएको छ ।
वि.सं.२०७८ असार २७ आइतवार १२:२१ मा प्रकाशित
