Sansar News
असार ३०, काठमाडौं । नेकपा (एमाले)का अध्यक्ष केपी शर्मा ओलीले वरिष्ठ नेता माधवकुमार नेपाललाई पार्टीभित्र कुनै ठाउँ नरहेको घोषणा गरेका छन् । बालुवाटार छाडेर निजी निवास बालकोट पुगेका उनले कार्यकर्तालाई सम्बोधन गर्दै यस्तो घोषणा गरेका हुन् ।
उनले कमजोरी महसुस गर्ने नेताहरुलाई ठाउँ दिने बताए पनि माधवको हकमा पनि त्यस्तो नरहने बताए ।
‘कमीकमजोरी स्वीकार्ने अन्यका हकमा पार्टीमा काम गर्न चाहनेलाई मौका दिन्छौं तर, माधव नेपालको हकमा गल्तीकमजोरी महशुस गरेपनि पार्टीमा स्वीकार्ने ठाउँ छैन’, ओलीले भने ।
उनले नेता नेपाल लाज सरम हराएको विश्वासघाती मान्छे भएको बताउँदै स्वीकार्न नसक्ने बताए । उनले भने, ‘माधव नेपाल जस्ता लाज सरम हराएका मान्छेहरु, विश्वासघाती तत्वहरुलाई स्वीकार्न सकिँदैन।’
ओलीले सम्बोधन गरिरहँदा कार्यकर्ताहरुले माधव नेपालप्रति निकै रुखो र अशिष्ट नाराबाजी लगाएका थिए ।
वि.सं.२०७८ असार ३० बुधवार १४:३६ मा प्रकाशित
