Sansar News
३० असार, काठमाडौं । नेपाल–भारत मानव विकास तथा मैत्री संघका अध्यक्ष सूर्य भुसाल नेपाली कांग्रेसमा प्रवेश गर्ने भएका छन् ।
नेपाली कांग्रेसको एक उच्च स्रोतका अनुसार उनी साउनको पहिलो सातामा औपचारिक रुपमै कांग्रेस प्रवेश गर्ने भएका हुन् ।
२१ वर्ष अगाडि नेपाल–भारत मानव विकास तथा मैत्री संघ खोली दुई देशवीच संसदस्तर, राजनैतिक दलका नेता कार्यकर्ताका स्तरमा र सर्वसाधारणका स्तरमा मैत्रीभाव बढाउने भूमिका निर्वाह गर्दै आएका भुसालले सो संस्थाका माध्यमबाट नेपालका ६३ जिल्लामा संगठन निर्माण गरेका छन् ।
भारतीय गान्धिवादी नेतृ निर्मलादेश पाण्डेको छत्रछायामा उत्प्रेरणा पाएका भुसालले ‘गान्धि ग्लोवल फ्यामीली’ बाट गान्धि सेवा पदक समेत पाएका छन् ।
गण्डकी प्रदेशको पर्वत जिल्लाको विहादी गाउँपालिकामा पुख्र्यौली घर भएका भुसाल सुरुमा नवलपरासीबाट चितवन हुँदै ३० औं वषैदेखि काठमाडौंमा क्रियाशील छन् । वामपन्थी पुष्ठभूमिबाट राजनीति सुरु गरेका उनले नयाँज्योती साप्ताहिक र एशिया एक्सप्रेस पत्रिका चलाउँदै व्यक्तित्व पहिचान गराएका हुन् ।
नेपालको द्धन्द्ध समाधानमा आन्तरिक रुपले सहजीकरण गरेका भुसाललाई कांग्रेस प्रवेश गर्दै हुनुहुन्छ रे नि ! भनि सोधिएको जिज्ञासामा उनले भने–‘अहिलेसम्म मलाई कुनै पनि प्रमुख पार्टीको सभापतिले औपचारिक रुपमा पार्टीमा काम गरौं नभनेको अवस्थामा देउवाजीले प्रस्ताव राख्नु भएको छ, मैले ओके भनेको छु ।’
वि.सं.२०७८ असार ३० बुधवार १४:२९ मा प्रकाशित
