Sansar News
असार ३०, काठमाडौं । नवनियुक्त अर्थमन्त्री जनार्दन शर्माले कर्मचारीलाई चाकडी गर्न नआउन आग्रह गरेका छन् । अर्थमन्त्रालयमा पदभार ग्रहणपछि कर्मचारीहरुसँग परिचयात्मक कार्यक्रममा बोल्दै उनले जिम्मेवारी प्राथमिकता राख्न आग्रह गरे ।
उनले कर्मचारी र मन्त्रीबीच ठूलो दुरी हुन नहुने बताए । उनले परम्परागत शैलीमा प्रस्तुत नहुन पनि कर्मचारीहरुलाई आग्रह गरे ।
‘साथी भाई हो हामी, कुनै ठूलो दुरी राख्नुपर्दैन्, मन्त्री, प्रधानमन्त्री कुनै ठूलो होइन्, दाजुभाई हो हामीहरु’, शर्माले भने, ‘कुनै चाकडीको भाषा बोल्नु पर्दैन् मसँग, परम्परागत खालको कुनै सम्मान व्यक्त गर्नुपर्दैन्, सिधा–सिधा साथीभाई, दाजुभाईको नातामा हामी सहकार्य गर्नेछौं ।’
उनले व्यक्तिको क्षमताअनुसार अगाडि बढ्न सहयोग गर्ने प्रतिबद्धता व्यक्त गरे । उनले सबै कर्मचारीलाई सिर्जनशील भएर काम गर्न आग्रह गरे ।
वि.सं.२०७८ असार ३० बुधवार १७:१९ मा प्रकाशित
