Sansar News
असार ३१, काठमाडौं । सरकारले प्रतिनिधि सभा बैठक साउन ३ गते सिफारिस गर्ने निर्णय गरेको छ । सिंहदरबारमा बसेको मन्त्रिपरिषद बैठकले साउन ३ गते अपरान्ह ४ बजे बैठक बोलाउन राष्ट्रपति विद्यादेवी भण्डारीलाई सिफारिस गर्ने निर्णय गरेको हो ।
सरकारका प्रवक्ता ज्ञानेन्द्रबहादुर कार्कीले जनाएअनुसार साउन ३ गते अपरान्ह ४ बजे बैठक बोलाउनका लागि सिफारिस गरिएको छ । सरकारको सिफारिसमा राष्ट्रपतिले प्रतिनिधि सभा अधिवेशन बोलाउने प्रचलन छ।
निर्वतमान प्रधानमन्त्री केपी शर्मा ओलीले गत जेठ ८ को मध्यरात विघटन गरेको प्रतिनिधि सभालाई सर्वोच्च अदालतको संवैधानिक इजलासले असार २८ मा पुनःस्थापना गर्ने फैसला गरेको थियो ।
अदालतले फैसलामा १ साताभित्र अधिवेशन आव्हान गर्न पनि परमादेश जारी गरेको थियो । अदालतको परमादेशबमोजिम मन्त्रिपरिषदले अधिवेशन आव्हानको सिफारिस गरेको हो ।
वि.सं.२०७८ असार ३१ बिहीवार १५:३९ मा प्रकाशित
