हामी सबैकाे संसारन्यूज

१ साउन, काठमाडौं । विश्वव्यापी महामारीका रुपमा फैलिएको कोरोना भाइरस संक्रमणका कारण पछिल्ला दिनमा विभिन्न नयाँ समस्याहरु देखिँदै आएका छन् ।

ती समस्या मध्ये एक हो म्युकोर्माइकोसिस अर्थात् कालो ढुँसी । पछिल्ला केही समय कोरोना संक्रमण भएर निको भएकाहरुमा कालो ढुँसीको संक्रमण देखिन थालेको छ । कालो ढुँसी संक्रमण कोरोना भाइरस संक्रमण नभएकालाई हुन्छ कि हुँदैन भन्ने प्रश्न धेरै उब्जिएका छन् ।

यस विषयमा स्वास्थ्य मन्त्रालयले धेरैजसो शरीरको प्रतिरक्षा प्रणाली कमजोर भएका, मधुमेहका रोगी, स्टेरोइडको अत्यधिक प्रयोग गरेका तथा क्यान्सर रोग भएका व्यक्तिमा कालो ढुँसी देखापर्न सक्ने बताएको छ । कोरोना संक्रमित नभएर पनि यस्ता समस्या भएका व्यक्तिमा कालो ढुँसी संक्रमणको जोखिम बढी हुन्छ ।

के हुन् त कालो ढुँसीका लक्षण ?
कालो ढुँसी संक्रमण भएको अवस्थामा एउटा आँखा वरिपरी सुन्निने, अनुहार तथा टाउको एकापट्टि दुख्ने, एकापट्टिको आँखा रातो हुने तथा नाकमा वा मुखमा कालो धब्बाहरु देखिने तथा ज्वरो आउनले यसका लक्षण रहेको पनि मन्त्रालयले जानकारी दिएको छ ।