हामी सबैकाे संसारन्यूज

साउन ४, काठमाडौं । नेकपा (एमाले)को संस्थापन पक्ष पार्टी निर्देशन उल्लंघन गर्ने २२ सांसदमाथि थप कारबाहीको निर्णय लिन छलफलमा जुटेको छ । केन्द्रीय समिति बैठकबाट स्पष्टीकरण सोध्ने निर्णय लिएको एमालेको संस्थापन पक्ष थप कारबाहीको निर्णय लिन ओली निवास बालकोटमा छलफलमा जुटेको हो ।

नेताहरु केन्द्रीय समिति बैठक सकिए लगत्तै बालकोट पुगेका थिए ।

एमालेले पार्टी निर्देशन उल्लंघन गर्ने माधवकुमार नेपालसहित २२ सांसदलाई २४ घण्टे स्पष्टीकरण सोध्ने निर्णय गरेको थियो । तर, उनीहरुले जवाफ नदिए कस्तो कारबाही गर्ने भन्ने निर्णय केन्द्रीय समितिले लिएको छ । जसबारे निर्णय लिन बालकोटमा संस्थापन पक्षमा स्थायी समिति सदस्यहरु जम्मा भएका हुन् ।

आइतबार प्रधानमन्त्री शेरबहादुर देउवाको पक्षमा माधव नेपालसहित उनी पक्षका १३ र पार्टी अध्यक्ष केपी शर्मा ओली पक्षमा खुल्दै आएका ९ सांसदले मत दिएका थिए । देउवाको पक्षमा ओली पक्षमै देखिएका सांसद खुलेसँगै कस्तो कारबाही गर्ने भन्ने विषय अन्यौंल बनेको छ ।

साथै ओली पक्षभित्रै कारबाहीबारे मतभेद छ । ओली पक्षका दोस्रो तहमा देखिएका केहि नेताहरु पार्टीलाई एकताबद्ध बनाउने अभियानमा जुटेका छन् । उनीहरुले कारबाहीभन्दा संवादलाई जोड दिनुपर्ने बताउँदै आएका छन् ।

सम्बन्धित समाचार

एमाले बैठक : देउवालाई मत दिने सांसदलाई २४ घण्टे स्पष्टीकरण सोध्ने निर्णय

सांसद पार्वती विशुन्के भन्छिन् – कारबाही हामीलाई होइन् पार्टी र संसद सिध्याउन खोज्ने ओलीलाई हुनुपर्छ