Sansar News
साउन ५, काठमाडौं । नेकपा (एमाले)का नेता महेश बस्नेतले माधव नेपाललाई पार्टी छाडेर जान आग्रह गरेका छन् । मंगलबार राष्ट्रिय युवा संघ अन्तरजिल्ला विशेष प्रदेशको विस्तारित भेलालाई सम्बोधन गर्दै उनले पार्टीभित्रै बसेर पार्टीको विरोध गर्न नसुहाउने बताए ।
उनले माधव नेपाललाई विधि र पद्धतिको कुरा गर्दै पार्टी हितविपरित काम नगर्न चेतावनी दिए । उनले एमालेमै बसेर एमालेकै विरुद्व काम गर्न नछाड्दासम्म पुत्ला जलाउन पनि नछाड्ने बताए ।
उनले माधव नेपालले एमाले छाडे सम्मानपूर्वक बिदा गर्ने पनि बताए ।
‘साँच्चिकै विधि, पद्धति र नीतिको कुरा गर्ने हो भने तपाईँ (माधवकुमार नेपाल) एमाले छोडेर जान सक्नुहुन्छ, एमाले फोर्न सक्नुहुन्छ, तर एमालेमा बसेर पार्टीको हितविरुद्व काम गर्न पाउनहुन्न’, बस्नेतले भने, ‘तपाईँ एमालेमा बस्न चाहनुहुन्न भने कृपया तपाईँले छोड्नुहोस्, हामी पुत्ला जलाउँदैनौं । तपाईँलाई सम्मानपूर्वक बिदा गर्छौं । तर एमालेमा बसेर एमालेलाई बर्बाद गर्ने स्थितिमा राष्ट्रिय युवा संघले प्रतिवाद गर्छ ।’
एमालेलाई जोगाउन युवा पंक्तिले जस्तो सुकै कदम चाल्न पनि तयार हुने उनको भनाई छ ।
एक अर्को प्रसङ्गमा बोल्दै बस्नेतले प्रचण्ड आफुँहरु डराएर सुरक्षा थप गरेको बताए । उनले एमाले पंक्ति प्रचण्डसँग कत्ति पनि नडराएको बताए ।
वि.सं.२०७८ साउन ५ मंगलवार १६:४७ मा प्रकाशित
