हामी सबैकाे संसारन्यूज

२२ साउन, काठमाडौँ । स्वास्थ्य तथा जनसंख्या मन्त्रालयले कक्षा १२ सहितका सबै परीक्षा स्थगित गर्न सिफारिस गरेको छ । परीक्षाको मिति तोकी तालिकासमेत सार्वजनिक भैसकेको अवस्था भएपनि कोरोना संक्रमण फैलिँदै गएको भन्दैै जनस्तरबाट चौतर्फी दबाब पर्न थालेपछि मन्त्रालयले उक्त सिफारीस गरेको हो ।

स्वास्थ्य राज्यमन्त्री उमेश श्रेष्ठले सामाजिक सञ्जालमार्फत कोरोना संक्रमण फैलिँदै गरेको अहिलेको अवस्थालाई ध्यान दिँदै सबै परीक्षा स्थगित गर्न शिक्षा मन्त्रालय र कोभिड–१९ सङ्कट व्यवस्थापन केन्द्र (सीएमसी)लाई सिफारिस गरेको जानकारी दिएका छन् । स्वास्थ्य मन्त्रालयले विज्ञहरुसँगको छलफलपछि परीक्षा सञ्चालन गर्न उपयुक्त नहुने सिफारिस गरेको होे ।

‘कोभिड–१९ संक्रमण फैलदैं गएको विद्यमान परिस्थितिमा ४ लाख विद्यार्थीको जीवनरक्षाप्रति हामी अत्यन्त संवेदनशील छौं। स्वास्थ्य तथा जनसंख्या मन्त्रालयले निकट भविष्यमा हुन लागेका सबै परीक्षा स्थगन गर्न शिक्षा मन्त्रालय र कोभिड–१९ संकट व्यवस्थापन केन्द्रलाई सिफारिश गरेको जानकारी गराउँछु’, उनले ट्वीटरमार्फत भनेका छन् ।

राष्ट्रिय परीक्षा बोर्डले यही साउन ३१ गतेदेखि ९ दिनसम्म कक्षा १२ को परीक्षा सञ्चालन गर्ने तयारी गरेको थियो । तर पछिल्ला दिनमा कोरोना संक्रमितको संख्या बढ्दै गएपछि परीक्षा स्थगित गर्न सरकारलाई दबाब बढेको थियो । सीएमसीले विद्यार्थीको भौतिक उपस्थितिमै कक्षा १२ को परीक्षा गर्न अनुमति दिएसँगै बोर्डले सबै स्वास्थ्य मापदण्ड पुरा गरी होम सेन्टरबाटै परीक्षा लिने तयारी गरेको थियो ।