Sansar News
२२ साउन, काठमाडौँ । कोरोना भाइरसवि?द्धको पहिलो खोप लगाएर दोस्रो डोज खोप लगाउन बाँकी जेष्ठ नागरिकहरूले खोप लगाउन पाउने भएका छन् । दोस्रो खोप लगाउन बाँकी १३ लाख ३८ हजार बढी ज्येष्ठ नागरिकलाई साउन २५ गतेदेखि खोप लगाउन पाउने भएका हुन् ।
स्वास्थ्य सेवा विभाग खोप महाशाखाका प्रमुख डा. झलक गौतमले १३ लाख ६८ हजार मानिस कोभिसिल्डको पहिलो डोज लगाएर दोस्रो डोजको पर्खाइमा रहेकाले ती मानिसहरूलाई साउन २५ गतेदेखि दोस्रो डोज दिन सुरू गरिने जानकारी दिए ।
शुक्रबार भुटानले २ लाख ३० हजार ‘एस्ट्राजेनेका’ को खोप नेपाललाई दिएसँगै दोस्रो डोजको पर्खाइमा रहेकाहरूलाई खोप दिन लागिएको हो।
खोप महाशाखाका अनुसार सुरूमा क्रमशः बागमती, गण्डकी, लुम्बिनी, कर्णाली र सुदूरपश्चिम प्रदेशका नागरिकलाई उक्त खोप दिइने छ । उक्त खोप अभियान प्रदेश १ र २ मा भने केही दिन ढिलो हुने जनाइएको छ । प्रदेश १ र २ मा शनिबार र आइतबार जापानबाट थप ८ लाख खोप आइपुगेपछि दोस्रो डोज लगाउन बाँकी रहेकाहरूलाई दिइने पनि डा. गौतमले जानकारी दिए ।
गत फागुन तेस्रो साता ६५ वर्षमाथिका १३ लाख ३८ हजार भन्दा बढी जेष्ठ नागरिकले भारतको सेरम इन्स्टिच्यूटले विकास गरेको कोभिशिल्ड खोपको पहिलो डोज लगाएका थिए । पहिलो डोज लगाएको १२ सातापछि दोस्रो डोज लगाउनुपर्ने भएपनि भारतले स्वास्थ्य तथा जनसंख्या मन्त्रालयले खरिद सम्झौता अनुसारकाे दश लाख डोज खोप नदिएपछि उनीहरूले खोप लगाउन पाएका थिएनन्।
वि.सं.२०७८ साउन २२ शुक्रवार २०:१५ मा प्रकाशित
