हामी सबैकाे संसारन्यूज

भदौ ४, काठमाडौं । नेकपा (एमाले)का सांसदहरु पार्टीले कारबाही गरेका १४ सांसदलाई पदमुक्त गर्न माग गर्दै सभामुख अग्निप्रसाद सापकोटाको च्याम्बर घेराउ गर्न पुगेका छन् । शुक्रबार सिंहदरबारस्थित सभामुखको कार्यकक्षमा उनीहरु दबाब बढाउने उद्देश्यले घेरा उगर्न पुगेका हुन् ।

शुक्रबार कार्यालय समय शुरु हुनासाथ उनीहरु कार्यकक्षमा पुगेका थिए । माधव नेपालसहित १४ सांसदमाथि गरिएको कारबाही अघि बढाउने उद्देश्यले गएको एमाले सांसद खगराज अधिकारीले जानकारी दिए ।

सभामुखको च्याम्बरमा अधिकारीसहित एमाले सचेतक शान्ता चौधरी, गोकुल बास्कोटा,कृष्णभक्त पोखरेल,राजेन्द्र गौतम,लालबाबु पण्डित,विमला विश्वकर्मा,गोमा देवकोटा,सूर्य पाठक लगायत छन् ।

यसअघि बिहीबार पनि एमाले सांसदहरु सभामुख सापकोटालाई दबाब दिने उद्देश्यले भेट्न पुगेका थिए । उनीहरुले सभामुखमाथि धम्कीपूर्णं रुपमा तत्कालै निष्कासनको सूचना टाँस गर्न आग्रह गरेका थिए ।

नयाँ दल दर्ताको तयारी गरेको माधवकुमार नेपाल नेतृत्वको समूहका १४ सांसदलाई पार्टी अध्यक्ष केपी शर्मा ओलीले गत भदौ १४ मा सांसद पदबाट पनि हटाउने निर्णय गर्दै संसद सचिवालयलाई पत्र पठाएका थिए । तर, माधव पक्षले भने उक्त कारबाही अवैधानिक भन्दै अघि नबढाउन आग्रह गर्दै आएको छ ।