हामी सबैकाे संसारन्यूज

भदौ ४, काठमाडौं । सभामुख अग्निप्रसाद सापकोटा नआएपछि नेकपा (एमाले)का सांसदहरु धर्ना स्थगित गरेर फर्किएका छन् । सिंहदरबारस्थित सभामुखको कार्यालयमा धर्ना दिन पुगेका सांसदहरु झण्डै २ घण्टा पर्खिएर फर्केका हुन् ।

एमालेकी सचेतक शान्ता चौधरीले सभामुखले नआउने बताएपछि धर्ना स्थगित गरेर बाहिरिएको बताइन् । सभामुखले आफुँहरुको मागलाई फेस नै गर्न नसक्ने अवस्था देखिएको उनको टिप्पणी छ ।

‘उहाँ हामीलाई फेस गर्न सक्नुहुन्न भन्ने लाग्यो, उहाँ भागेको हो भन्ने हाम्रो बुझाई छ’, सभामुख कक्षबाट बाहिरिएकी उनले भनेकी छिन्, ‘हामीले दुई घण्टा कुरेर बस्यौं तर, उहाँले आउन सक्दिन भन्नुभयो, उहाँले ध्यानाकर्षण भयो केहि दिनमै टुंगो लाग्छ भन्नुभएको छ, हेरौं के हुन्छ ।’

शुक्रबार कार्यालय समय शुरु हुनासाथ सचेतक चौधरीसहित एमालेका सांसदहरु धर्ना दिन सभामुखको कार्यकक्षमा पुगेका थिए । माधव नेपालसहित १४ सांसदमाथि गरिएको कारबाही अघि बढाउन उनीहरुको माग छ ।

यसअघि बिहीबार पनि प्रमुख सचेतक विशाल भट्टराईको नेतृत्वमा एमालेका सांसदहरु कारबाहीलाई अघि बढाउन भन्दै सभामुखलाई भेट्न पुगेका थिए । बिहीबार सभामुख र एमालेका सांसदहरुबीच चर्काचर्की पनि भएको थियो ।

एमालेका सांसदहरुले १४ सांसदमाथिको कारबाही प्रक्रिया अघि नबढाए बल प्रयोग गर्ने बताएपछि सभामुख जंगीएका थिए ।

सम्बन्धित समाचार

सभामुखको कार्यकक्ष घेराउ गर्न पुगे एमाले सांसद, १४ सांसदलाई तत्कालै पदमुक्त गर्न माग